Акафист чесному и въсехвалному пророку предтечи и крестителю господьню иоанъну поем.
[Колонтитул в верхней части страниц:] Радости їоану предтечи
Стих 1.
Почитаем славную паметь твою, богом* похваленый їоанне г[о]с[по]день предтече, болей всехъ пророковъ, они же словесы хр[и]ста проповедаша, ты убо показавый его перстом, г[лаго]ля: сЪ агнец божий во земля и грехъ миру, того моли подати намъ велию свою милость.
Стих вторы.
Иже зачатиемъ своимъ отца удивилъ во чрЪве материне, створителя своего позналъ и ко пришествию его, яко всесветнаго царя, радость с поклонениемъ показал, тем же достоинъ былъ еси от света незаходимаго светлость приняти и во утробе посвященъ быти, сего ради приносимъ тобЪ радосная, чесный їоанне предтече.
Стих трети.
Сам ты, преблаженЪ їоанне, от ангела имя принял, нарожениемъ своимъ многих людей обвеселилъ, во младости, единый сынъ великаго ерея, богу послужити изъбралъ, тем же и достойне от него похвален есь, яко не воста в роженых женами более їоанна кр[е]ст[ите]ля, того моли подати нам на земли миръ и по смерти ц[а]рство небесное.
Слава.
Ангелское житие явилъ еси въсемъ намъ, пресв[я]тый крестителю г[о]с[по]день, и троицу живоначалную ясне проповедалъ, бога отца слыша гласъ с неба, свиделствуемъ и г[лаго]лющь къ сыну: ты есь сынъ мой возлюбленный, в тобе благоизволихъ, - бога сына крещаема и руками осезаема показалъ еси, бога св[я]т[а]го духа виде образомъ, яко голуба, исходяща нань, тем же вси верни навчихомся пети бога во троици едина.
I ныне.
Лукавый иродъ, не хотяй оставити прелюбыдейци, жены брата своего, тобою запрещенъ бывъ, пресладкий учителю їоанне, повелети в темници затворену, главу всекнут и тую неучтивая плясовица принесе на блюде на проклятое пирование. Мы же видяще яко свет сиающи житие твое и невинное усекновение св[я]тыя главы твоея, воспеваем ти, г[лаго]люще: радуйся, чесный предтече и крестителю господень.
Кондак первы.
Достойны сведетелю хр[и]стов [в оригинале опечатка: "рхстов"], о тобЪ убо евангелистъ г[лаго]леть: бысть человекъ посланъ от бога, имя ему їоаннъ, сей прииде во свЪдетельство, да свЪдетельствуе[т] о свете, да вси веру имуть ему. Тем же и мы, верующие во хр[и]ста, по твоему сведетелству поемъ тому вси аллїлуїа.
[Икосъ первы.]
О пречудном зачатьи твоемъ, їоанне, дивяшеся чтемы, явися убо отцу твоему ангелъ господень, стоя одесную олтяря [так!] кадилнаго, и той смутися видевъ его, и страхъ нападе нань. Рече к нему ангелъ: не бойся, захария, занужъ услышана естъ молитва твоя и жена твоя елизаветъ родить сына тобЪ, и наречеши имя ему иоаннъ, и будеть тобЪ радость и веселие, и мнози о рожестве его возрадуются. Темъ же и мы радующеся, тобЪ радосная приносим, поюще: радуйся, радости многим подателю, радуїсяу [так!], печалей злых отгонителю, радуйся, человече, от бога посланый ко вернымъ, радуйся, сведетельствовавъ о свете истинномъ. Радуйся, сыну ерея, почину великаго, радуйся, плоде родителя праведнаго. Радуйся, гласе вопиющаго во пустыни, радуйся, веляй уготовати пути г[о]с[по]дьни. Радуйся, твое зачатие ангел известоваше, радуйся, внегда отець поряду во храме кадяше. Радуйся, ангеле, от бога посланый, радуйся, пред лицемъ его путь устрояй. Радуйся, чесный предтече и крестителю господень.
Кондак вторы.
Конце всея земли празнують твое, иоанне, св[я]т[о]е зачатие, во чреве убо материне посвящен еси. Пророку еремии*, о тобе глаголющу, бысть слово г[о]с[по]дьне. Первее, нежели создах тя во чреве, знах тя и прежде выштия твоего с ложеснъ осв[я]тих тя. Сего ради и мы, празнующе торжество твое и хваляще тя, поемъ г[о]с[по]ду богу аллилуїа.
Икосъ вторы.
Тогда богородица мария, слышавши от архангела, благовестующа о зачатиї твоем, їоанне, пресв[я]т[о]е, иде со дщаниемъ во град и'удовъ и внии'де в домъ захарии'нъ и целова елизавет, и бысть, яко услыша елисавет целование марии'но, возрадовася младенец во чреве ея. Тем же и мы радосне поемъ тобЪ: радуйся, в животе материне посвященый, радуйся, во втробе духа св[я]т[а]го исъполненый. Радуйся, от ангела "їоаннъ" и'менован, радуйся, и тым же именемъ от родителей возванъ. Радуйся, сотворителя своего в ложеснахъ материныхъ познавый, радуйся, и пришествию того с радостию ся поклонивый. Радуйся, принявъ светлость от солнеца, радуйся, сроднику г[о]с[по]да нашего ї[су]са. Радуйся, духа св[я]та елизаветъ, мати твоя, исполнена, радуйся, сия благославенну въ женахъ богородицу повЪдила. Радуйся, для тебе родители твои' возвеселишеся, радуйся, и мнози зачатию твоему во старости их дивишеся. Радуйся, чесны предтече и кр[е]ст[ите]лю г[о]с[по]день.
Кондакъ трети.
Оуслышав захария от ангела о зачатии' твоемъ, їоанне достойне, рече: по чему разумею сее, азъ бо есмъ старъ и жена моя заматеревшая во днехъ своихъ. Отвеща ему ангелъ и рече: азъ есми гаврїилъ, предстояй предъ богомъ, и посланъ есмъ благовЪстити тобЪ сия. Слышавъ же таковая, захария воспе сердечне аллилуйа.
Iкосъ трети.
Разумети людие хотяще тайну, видевше отца твоего, їоанне, захарию, исходяща от олтаря кадилнаго нема, помышляху, яко видение видяше. Уведевши же по сихъ твое радосное нарожение, мнози радовахуся и тобЪ радосная приношаху, глаголюще: радуйся, отроча добродушное и превтешеное, радуйся, детище всея благодати исполненое. Радуйся, пречудное нарожение свое нам являя, радуйся, многихъ людей тымъ обвеселяя. Радуйся, яко рука г[о]с[по]дьня бЪ всегда с тобою, радуйся, яко велия пророчества быша при твоемъ нароженью. Радуйся, отцу своему глаголание навративый, радуйся, матери поношение неплодия отнявый. Радуйся, при твоемъ нарожении пречистая дева бяше, радуйся, и носящи всехъ создателя тобЪ послужаше. Радуйся, отець твой, захария, исполнися духа св[я]та, радуйся, и пророкуя пояше величая хр[и]ста. Радуйся, чесный предтече и кр[е]ст[ите]лю г[о]с[по]д[е]нь.
Кондакъ четверты.
Слышавши же елизаветъ играние твое, їоанне пресвяте, во чреве своемъ, исполнися духа св[я]та и возопи гласомъ велиим ко богородици и рече: благославена ты в женахъ, и благославенъ плодъ чрева твоего, и откуду мне сее, да приде мати г[о]с[по]да моего ко мне, се бо, яко бысть глас привитания твоего во ушию моих, возыграся младенець радощами во чреве моемъ. Тем же и мы радующеся вопиемъ г[о]с[по]ду богу аллилуїа.
Iкосъ четверты.
Когда отверзошеся уста и языкъ захарии, отца твоего, по рожестве твоем, їоанне всеблаженне, исполнися духа с[вя]та и пророчествова, г[лаго]ля: благословЪнъ г[о]с[по]дь богъ израилевъ, яко посети и сотвори избавление людем своим. Радуяся даже и сконча. Тем же и мы радосная поем, тобе г[лаго]люще: радуйся, во младости своей напущи г[о]с[по]ду послуживы, радуйся, вси мирския похоти для бога опустивы. Радуйся, ты вина и пития упояющего не укусилъ, радуйся, ты ризу от шерсти вельблюжее на собе носил. Радуйся, многие люди ко г[о]с[по]ду богу навративый, радуйся, разныя языки житиемъ своимъ просветивый. Радуйся, ты пищу диви медъ и прузи поживалъ, радуйся, ты во иордани людей приходящих крестил. Радуйся фарисеевъ и садукеев смеле каравый, радуйся, покаяние о гресехъ чинити повелевый. Радуйся, ты исповедь греховную уставилъ, радуйся, ты кающимся ц[а]рство небесное обещалъ. Радуйся, чесный предтече и крестителю господень.
Кондакъ пяты.
Оу тебе вопрошаху иудеи', посланые от ерусалима, г[лаго]люще: ты кто еси? И исповЪдалъ еси имъ, їоанне премудре, яко несмъ азъ х[ристо]съ, но гласъ вопиющего во пустыни, исправте путь господень. Азъ крещаю вы водою, посреди же васъ стоить, его же вы не весте, той естъ грядый по мне, иже предо мною бысть. Мы же, познавши свЪдельством твоим хр[и]ста, поемъ аллилуїа.
Iкосъ пяты.
Рече г[о]с[по]дь ї[су]съ о тобЪ, преизбранны їоанне, яко не воста более тебе межи сынми нарожеными в женахъ. И яко жъ нЪдостойныи' мы достойне можемъ тебЪ, богомъ хваленого похвалити, но радостию влекоми, тобе радосная приглашаемъ, поюще: радуйся, ноя праведнаго предъ богом справедливейши, радуйся, авраама верна словесемъ г[о]с[по]дьнимъ вернейши. Радуйся, исаака, ведена ко жертве, послушнейши, радуйся, якова во чадехъ духовныхъ множайши. Радуйся, леввия во племени своемъ достойнейши, радуйся, їосифа во чистоте телесной краснейши. Радуйся, їова во младости своей терпеливши, радуйся, моисея в законе божиемъ яснейши. Радуйся, аарона въ жертовномъ чину св[я]тейши, радуся [так!], елиазара въ божиемъ ревновании смелейши. Радуйся, исуса наввина во бранехъ духовныхъ крепчейши, радуйся, калефа во согледании' земли обетованное хвальнейши. Радуйся, чесный предътече и крестителю господень.
Кондакъ шесты.
Иже послани быша от фарисей вопросити тебе, что крещаеши, аще ты не иси [так!] х[ристо]съ, ни илия, ни пророкъ. Ты же, їоанне св[я]те, отвещалъ еси имъ, г[лаго]ля: азъ крещаю васъ водою къ покаянию, греды же по мне креплей мене естъ, ему же несмъ достоинъ обуви понести, той вы крестить в духу св[я]том. Тем же и мы крещеные поемъ аллилуїа.
Iкосъ шесты.
Неизреченное воздержание жития твоего видяще, дивимся, їоанне достойне, ангела бо тя, во плоти с человеки на земли живуща, разумеваемъ. Темъ же и славяще паметь твою тобЪ радосная воспеваем, г[лаго]люще: радуйся, наставниче великий спасению, радуйся, приводяй грешныхъ къ покаанию. Радуйся, чудесъ хр[и]стовыхъ извесное похваление, радуйся, душамъ немощнымъ подавая здравие. Радуйся, во иорданской реце грехи омывая, радуйся, покаяние славне проповедуя. Радуйся, агнеца божия перстомъ показавый, радуїся, возъемлющего грехъ миру явивый. Радуйся, крещениемъ весь миръ обновляющи, радуйся, и темъ разумъ нашъ освЪщающи. Радуйся, всю силу бесовскую сокрушивый, радуйся, ц[а]рствия небеснаго путь показавый. Радуйся, чесный предътече и крестителю господень.
Кондакъ седмый.
Иже от века неслыхано бысть, сынъ божий на иорданъ прии'де к тобЪ, їоане, креститися. Ты же возбраняше ему, г[лаго]ля: азъ требую от тебе креститися, и ты грядеши ко мнЪ. Отвещав же ти ї[су]съ и рече: остави ныне, тако убо подобно исполнити намъ всяку правду. Мы же богу крещаемому поемъ радосне аллилуйа.
Iкосъ седмый.
Человекъ и богъ явился еси, хр[и]сте, на иордани їоанну быти, руками бо пречистую плоть твою осязаше и гласъ с небеси от бога отца сведетельствуемъ слышаше: сей естъ сынъ мой возлюбленный, о нем же благоизволихъ. Сего ради и мы с радостию вопиемъ: радуйся, крестителю г[о]с[по]да нашего ї[су]са, радуїся, крестящегося прославивый хр[и]ста. Радуйся, крещениемъ вес миръ обновивый, радуйся, крестящему хвалу воздавый. Радуйся, крещая и во водахъ иорданскыхъ, радуйся, крестивъ с ними всехъ приходящихъ. Радуйся, крестився от тебе ї[су]съ во иордани възыйде, радуйся, крестящуся ему дух св[я]тый нань изыде. Радуйся, крещаема хр[и]ста глас с неба слышал, радуйся, крестимому ему бог отець сведетельствовал. Радуйся, крещение во оставление грехом проповЪдуя, радуйся, крестящимся райские двери отвирая. Радуйся, чесный предътече и крестителю господень.
Кондакъ осмый.
Фарисей и садукей виделъ еси, блаженне їоанне, идущих на крещение, к ним же и г[лаго]ля: исчадие ехидново, кто скажеть вам убежати от прии'дущего гневу, сотворите убо плодъ достои'нъ покаания. Тем же и мы, кающеся о гресехъ, поемъ аллилуїа.
Iкосъ осмый.
Разумъ ангелский подай намъ, хвалящимъ паметь твою, їоанне пресвяте, ты убо есь болей пророка, о тобЪ писано естъ: сЪ азъ пошлю ангела своего предъ лицем твоимъ, иже уготовить путь твой предъ тобою. Тем же и мы поемъ тобе таковая: радуйся, смелейши смысломъ гедеона чуднаго, радуйся, силнеши духомъ самсона моцнаго. Радуйся, смиренеши серцем самуила чеснаго, радуйся, умилнейши пением давыда терпеливаго. Радуйся, множайши разумом саломона мудраго, радуйся, совершенши иночествомъ илии ревниваго. Радуйся, сладши друголюбствомъ елисея щедраго, радуйся, яснейши пророчеством исаи' богословиваго. Радуйся, болши терпениемъ еремии' плачливаго, радуйся, вышши видением езекииля богозримаго. Радуйся, прозорнейши умомъ данила жадостиваго, радуйся, святейши душею варуфа послушливаго. Радуйся, чесный предтече и крестителю господень.
Кондакъ девяты.
Ангельскому житию твоему дивящеся, їоанне чесый [так!], молитвы приносимъ, вси бо пророци и законъ до тебе прорекоша сведетельствующу г[о]с[по]ду нашему ї[су]су хр[и]сту, ему же вернии поемъ аллилуйа.
Iкосъ девяты.
Недоумеемъ достойне славити тя, достойный всякое хвалы божий предтече и крестителю їоанне, толико любовию влекоми дерзнухомъ пети тобЪ таковая: радуїся, ангелское житие нам являя, радуйся, всяку язву отгоняя. Радуйся, взорЪ кротости, радуйся, зерцало терпеливости. Радуйся, светило неугасаемое, радуйся, солнеце праведное. Радуйся, оучителю божиих заповедей, радуйся, справителю многих людей. Радуйся, истиннаго наказателю разума, радуйся, тайнаго подателю ума. Радуйся, мирскую славу опустивы, радуйся, пустынную жызнь изволивы. Радуїся, чесны предтече и кр[е]ст[ите]лю г[о]с[по]день.
Кондакъ десяты.
Царя ирода четверовласнаго смеле каралъ еси, їоанне св[я]те, жены ради филипа, брата его, ея же неподобаше ему имети, и той повЪле тя въ темници затворити. Ты же, седяй в ней, пояше богу аллилуйя.
Iкосъ десяты.
Иже прихожаху к тобе на иорданъ народи креститися, и вопрошаху, г[лаго]люще: что сотворим? И ты душеполезную навуку всем подаяше, тем же и вопияху тобЪ поюще: радуїся, обличителю пресладки, радуїся, наказателю преумелый. Радуйся, милостыню творить повелевая, радуйся, и неимеющихъ ризами и брашном спомагая. Радуйся, мытарем начав г[лаго]лати, радуйся, повеленная имъ казав чинити. Радуйся, воемъ [так!] давый добрые науки, радуйся, иже доволнымъ быти своими оброки. Радуйся, и повелевъ имъ никого не обидити, радуйся, к тому другу друга не оклеветати. Радуйся, спаса всемъ показавый, радуйся, и тому ся чесне поклонивый. Радуйся, чесный предтече и крестителю г[о]с[по]д[е]нь.
Кондакъ одиннадесяты.
Слышалъ есь, їоанне крестителю, во темници седяй, дела хр[и]стова и послалъ дву от ученикъ своихъ вопросити от него: ты ли еси грядый, чи ли иного чаемъ? Отвещавъ ї[су]съ и рече имъ шедше: возвестите їоаннови, яже слышасте и видесте. Мы же, уведевши сия, поемъ аллилуїа.
Iкосъ одиннадесяты.
Когда отидоша ученици твои', начатъ ї[су]съ народомъ г[лаго]лати о тобЪ, їоанне, прехвалне: почто изыдосте во пустыню видети пророка ли? Ей, г[лаго]лю вамъ, яко болши ес[т] пророка. Тем же и мы недостойнии' хвалим тя, поюще: радуйся, осии пророка чеснейши, радуйся, иоиля св[я]того славнейши. Радуїся, амоса пастыря терпливши, радуїся, авдея раба г[о]с[по]дьня достойнейши. Радуїся, ионы голуба послушнейши, радуйся, михея морастена св[я]тейши. Радуйся, наума втешителя умилнейши, радуйся, авакума воина крепка силнеїши. Радуїся, софонии' стража прозорнейши, радуйся, аггея веселаго краснейши. Радуйся, захарии' паметнаго полнейши, радуйся, малаха ангела яснейши. Радуйся, чесны предътече и крестителю господень.
Кондакъ дванадесяты.
Усекнувши спикуляторъ пречесную главу твою, їоанне, по повелению їродову и, принесши на блюде, далъ ю девици, и девица дала матери своей. Слышавши же ученици твои' прии'доша и взявши тело твое и положивше во гробЪ, возопиша ридающе къ господу богу аллїлуїа.
Iкосъ дванадесяты.
Слышавше вси людие ангелское на земли, їоанне, житие твое, бога во трои'ци единаго хвалять и тобЪ, сущему на небесехъ, радосная приносять, поюще: радуйся, учителю небеснаго жития, радуйся, сведетелю хр[и]стова во плоти пришествия. Радуйся, пророче болей иных пророков, радуйся, после божи славнейши апостолов. Радуйся, пустыннику, мирскою честию и богатествомъ погордевый, радуїся, постнику, от младости богу послуживый. Радуйся, девственнику душею и теломъ, радуйся, мученику, пресилный разумом. Радуйся, исповеднику претихий, радуйся, иноку предивный. Радуйся, души моея радование, радуйся, ума моего навчение. Радуйся, чесный предтече и крестителю господень, їоанне.
Молитва по акафїсту.
Г[оспо]ди ї[су]се хр[и]сте, боже нашъ, родивый ся от пречистое девы нашего ради спасения и обрезавы ся плотию для ветхаго закону наполнения, во мужстве же прешедый на їорданъ от їоанна креститися, тайну живоначалное трои'це намъ явилъ есь и новое нарожение въ животъ вечный водою и духом св[я]тымъ уставил есь. Тобе ся молимъ, преславнаго ради богоявления своего и пречесного для крестителя твоего отпусти грехи наша. Ты же, св[я]тый їоанъне предтече божий, прими от недостойных радости сие и умоли царя небеснаго, его же во иордани крестил еси и о нем же ясне сведетельствовалъ еси, да подасть намъ на земли миръ, грЪхом очищение, немощнымъ здравие, смутнымъ потешение, ненадежнымъ надежу, воюющим ся за веру христову победу, пленником избавление, нагимъ одеяние, сиротам хлебокормление, по морю плывающим тишину, во путь шествующимъ пристанище, обидимым споможение ї всемъ хрестианом спасение, а по смерти ц[а]рство небесное, яко единъ человеколюбець и богъ нашъ.
Доконанъ естъ акафїстъ богу во трои'ци единому ко чти и св[я]тому всехвалному пророку божию, предтечи и крестителю г[о]с[по]дьню їоанну працею и пилностию в лекарских навукахъ доктора франциска скорины из славнаго града полоцька.
_________________________________________
Источник: Акафист чесному и въсехвалному пророку Предтечи и Крестителю Господьню Иоанъну поемъ. Вильно, ок. 1522 (Оригинал постранично выложен на сайте "Память России. Славянские издания кирилловского шрифта XV - первой четверти XVI века". http://sun450.agir.ru/rslmes/mydisk/MEMORY/cyril.htm). В послесловии к этому экземпляру имя Скорины выскоблено, вероятно, преднамеренно.
Послесловие приводится по факсимиле, размещенному в издании: Франциск Скорина и его время. Энциклопедический справочник. Мн., 1990 (с. 175).
* Еры, обозначенные в оригинале надстрочным значком, здесь не показываются.
* Буквой "й" здесь обозначаются буквы "и", снабженные у Скорины специальным надстрочным значком. Этим значком - одним из двух - Скорина обозначал особую фонему - среднюю между "и" и "й", схожую с украинским ї. Это подтверждается, в частности, написанием слова "еремии" во втором кондаке - в оригинале дат. падеж, но - "еремий". Йотированность таких фонем, обозначенная в оригинале всегда, показывается здесь выборочно апострофом.
__________________________________
Книга, изданная Франциском Скориной ок. 1522 г. в Вильне. Наряду с семью другими акафистами входила в состав "Малой подорожной книжки". /Акафист - это особый вид церковной хвалебной песни и молитвы Христу, Богородице и святым. Получил развитие в Византии в первом тысячелетии. Замечательный сайт по тематике: http://akafist.narod.ru/
Авторство Скорины установил А.А.Турилов в 1979 году. Данный акафист является акростихом, то есть если сложить первые буквы всех стихов, кондаков и икосов по порядку, то получим фразу: "Писал доктор Скоринич Францискус".
Перу Скорины принадлежит и другой акафист - "Акафист Иисусу" (определено по акростиху). Остальные изданные им акафисты известны в восточнославянских списках с 15 века (Турилов).
Все акафисты "Малой подорожной книжки": "Акафист гробу господню", "Акафист архангелу Михаилу", "Акафист Иоанну Предтече", "Акафист Богородице", "Акафист святому Петру и Павлу", "Акафист святому Николе", "Акафист Кресту Господню", "Акафист Иисусу".
Библиографические аспекты скорининских изданий акафистов изучены хорошо (см. Франциск Скорина и его время. Энциклопедический справочник. Мн., 1990). Гораздо меньше изучены собственно тексты. Значительный вклад в эту область внес А.А.Турилов (см. в том же издании его статью "Гимнографические произведения Ф.Скорины", а также статью "Гимнографическое наследие Франциска Скорины в рукописной традиции..." в сборнике "Проблемы научного описания рукописей и факсимильного издания памятников письменности. Л., 1981"). В антологиях старой белорусской поэзии акафисты, насколько мне известно, до сих пор не публиковались.
Между тем, два акафиста Скорины по своим художественным качествам на голову превосходят его другие стихотворные произведения и без преувеличения являются одними из наиболее ранних и блестящих шедевров белорусской и восточнославянской духовной поэзии.
Акафисты, написанные Скориной, получили большое распространение на восточнославянских и южнославянских территориях. "Акафист Иоанну Предтече" входил в список 1604 - 1605 годов, переписанный, вероятно, для Соловецкого монастыря. В издании "Акафисты пречестныи" (Киев, 1677) содержится переделанный вариант этого скорининского текста. Но "Акафист Иисусу" был, как указывает Турилов, распространен значительно шире, чем "Акафист Иоанну Предтече". Это объясняется тем, что в восточнославянских списках с 15 века были известны два других акафиста Иоанну Предтече (которые приписывались Исидору, патриарху Константинопольскому).