ШАВУЛІЦКІЯ КРЫЖЫ
Яны жылі тут па законах боскіх,
Вясной буслоў віталі ў небе сінім…
Ёсць два крыжа ля спаленае вёскі,
Ля нашай ваўкавыскае Хатыні.
А Бог адзін на ўсіх – для праваслаўных,
Каталікоў і іншых хрысціянаў,
Адна зямля на ўсіх, яна, як праўда,
Вялікая, святая, без падману.
Кугіча ў полі над крыжамі каня,
Зямельку нашу беражэ ад згубы…
Не будзе паміж намі развітання,
Пакуль гучаць архангелавы трубы!
Яны гучаць, гучаць скрозь пакаленні
Для чалавецтва вечным напамінам:
Калі ў нас ёсць і розум, і сумленне,
Мы не загінем, людзі, не загінем!