Укх безача зуль-хиджа бетта
Доаг1а бусулба наха г1урбан ди.
Из Аллах1а доттаг1ал Ше хетта
Иброахьама Пайхьмара суннат да!
Г1урбан дозал, маьла вайна гойташ,
Къуръан чухьа аят да..
Даьла Элча (Даьлера салам хилда цунна)
Цох доаладаь массехк хьадис а да..
Цу 1амала керттера дола ма1ан:
Аллах1а урс хьакх, аьнна амар дир
Иброахьамаг ца1 мар воацача во1а
Иштта везача Аллах1а из зийра...
Из Шийна мут1ахьа хилар гучадаьнна,
Дал цун байтар ялсмалера ка.
Аллах1а шийна даьчох раьза хинна,
Иброахьама г1урбанна бийра из ка...
Цу хан чохь я 1амала дозал гойташ,
Иштта вайга кхаьча хьадис да:
"Из зуль-хиджа бетта хьалхара итт ди
Далла эггар дукхах дезаш да"
Ц1айца даькъал бувца бусулба наха,
Шоайла дегчура доахаш хоза ловцаш,
Ч1оаг1лу бусулба вошал, телаш саг1а
Мискач наьха делдеш те1а дегаш...
Г1урбан ц1ийна т1адам 1о мел божа,
Дала къинох ц1ендеш хилда вай.
Дала Шийна духьал доаг1ач дийнахь
Шийна безачарех долда вай...
Везача Дала къоабал долда вай г1урба,
Иман, сабар ч1оаг1адолда вай.
Д1адоаккхийла къаман юкъера довнаш,
Барт-безаме даха ховшалд вай!