***

Лугьуда хьи чи бубайри
Риб чуьнуьхиз чувалда,
Жедайди туш алахъайт1ан,-
Зегьметар я  гьавайда.

«Халкьдин векил» хкягъ тавур
Са ни ят1ан эцигай,
Ацукьзава къе «тахтуна»,
-Алакьдат1а? - талгьудай.

Ак1 жезва хьи а « векилдиз»,-
Къазанмишай зурба т1вар,
Еке мажиб, ч1ехи къуллугъ,
Вичинди я а гьунар!

Жавабдарвал халкьдин вилик,
Маса буржияр четин,
Хиве аваз, тухузва вич,
Небгетди хьиз вахтунин..

Аквадайвал, к1валах кьилин,
Тарашун я «векилдин»,
«Векил туш, я халис угъри »,-
Гафар гьахъбур я элдин.

Амукьзава хьана мягьтел,
Ажугълу жез дак1вазва,
Уьзуькъара а касди вич
Уьзуьагъ яз къалазва.

Гьикьван- гьикьван яргъида мез
А векилдин - угъридин
Регъуьвал гвач гьич садрани
Аквадайла «кар» вичин.

Алцурарда гъил-гъилеваз,
На лугьуд вахъ кузва рик1,
Ат1уда як, къведач язух,
Ягъайбуру гьик1рай, гьик1?

Фендигарвал ганва адаз,
Авач анжах ягь, намус,
Эхиз жезмач акъатиз цак,
Акурла ахьтин шумуд.

Бязибуру атай ажугъ,
Секинарда ик1 лугьуз:-
Вучда чна, чара авач
Девран я гьахьтинбуруз.

Зун хьтинбур жезвач секин,
Девирдин авач тахсир,
Зун хьтинбур лап пара я,
Жеда угърийрин эхир..
                2010 йис