Вучиз икьван вун я дарих?
Туьхвена хьи рик1ин ялав?
Къе зун я ваз ухшар, гьайиф –
Чун сад садан алач патав.
Рик1из фадлай амач кьарай:
Акунамаз куьк1вей дак1ар,
Чар татайла, ийиз гьарай,
Атана хьуй - жеда гатфар.
Гагь жеда зун рик1и-рик1 нез,
Туп1алайиз лагьай гафар
Гагьни жеда лугьуз-хъуьрез.
Агакьайла зал ви чарар.
Бязи ч1авуз югъ жедалди
Вакай анжах хияларда.
Мад сеферда вун къведалди,
За руьгь к1вачел къарагъарда.
Аллагьди заз акьул гана,
Бахтуникай пай ат1ана.
Зун кьисметда тек тар хьана,
Гаф амукьнач мез кьурана.
Вуч манаваз заз чир хьанач,
Чун чахъ галаз гуьруьшарна?
Чара хьунухь эхиз хьанач,
Зи чанда къе бириш гьатна.
Пара яргъа ават1ани,
Рик1елай вун алатдайд туш.
Чи араяр къанат1ани
Рик1 рик1ивай къакъатдайд туш.