Ахтармишиз чилин къатар
К1ват1из вичик менфят зат1ар,
Каф алахьиз, падиз рагар
Хкатзава Ричал ятар.
Цмур дере, Цнал тамар,
Акьаз пеле ракъин нурар,
Тик гуьнедкай къугъвазвай гар
Хкатзава Ричал ятар.
Ргазвай вич куркур, куркур,
Яд уьлквейриз хьанвай машгьур,
Шампан зат1 туш патав лугьур
Хкатзава Ричал ятар.
Лезгистандин михьи чешме,
Хуп1 авурдан сифте легьзе,
Дад рик1елай тефир зерре
Хкатзава Ричал ятар.
Шумуд мани, шумуд макьам
Бахш авунвай вичиз тамам,
Дарман-дава, гьакьван хуррам
Хкатзава Ричал ятар.
Кьве виш (йи)сар тир вичин тарих,
Гьакьван ширин иштягьлу цихъ
Тамарзу яз, тахьуй къаних,
Бул хкатрай Ричал ятар!
2012г