Гьамишалугъ уяхди

         
Жум   хьтин, хъипи кьуьзуь къужа
Хъуьцуьганрихъ   агалтнава,
Набут   жендек   ава   гужа,
Фад - фад   угьдал  ацалтнава.

-Азиз,  ширин  ч1ехи   буба,
Суьгьбетарин,  жемир   вун   суст-
Алахънава хтулдин   хва,-
Валай   к1еви авач захъ   дуст.

Ксанвач   ам,  хиялрик   ква,
Гъил   аялдин   къуьнел  ала...
Ц1еридсавай   жаван  аскер
Къаравулда   муькъвел   ала.

Ахвар квахьна, дикъетлу  я,
-Лап   важиблу   объект   я  муьгъ!
Душмандиз   рехъ   ачух  тахьуй,
Ватан патал   герекд   я  муьгъ!

Командирдин   приказ   кьилиз
Акъудиз   чан  къведач   гьайиф!
Чук1ул   хьиз  сух  жезва  аяз...
Вуч мекьид тир а  хъуьт1уьн  йиф!

Ксанвач  ам,  хиялрик   ква,
Гъил  аялдин   къуьнел   ала...
Къанни   кьве   йис   жезвай   майор
Берлиндиз   физ   рекьел   ала.

Къизгъин женгер, экуь я цав,
Рейхстагдин аквазва цал!
-Виликди!Ша фин, хкажин
Гъалибвилин  Пайдах  кьац1ал!

Командирдин  приказ   кьилиз
Акъудиз   чан   къведач   гьайиф!
Дустар  телеф жезва патав,
Хирерикди   жезва  зайиф!...

-Ахваралач, уях я хва,
Гьамишалугъ  къвазда   къараз,
Нефес   кьурт1ан,  рекьидач   руьгь,
Жедач  садран  вакай  яргъаз!

Лезгистанни чи Россия
Хуьх вунани-буржи я ви,
Миллионриз эцигай чан
Вафалу хьун веси я зи!

Къвез   алатиз   фида   йисар,
Экв  гуз   жеда зун ви вилик,
Четин   бере    обелискриз,
Вад   пип1ен гъед   алай  килиг!
                4/04/2015