Дуьньяд винел мугьман хьана

   

Беден сура, лацу кафан,
Эхиримжи ви пек инсан,
Ахквадач мад дуьнья масан,
Сурукай ваз макан хьана.

Куьдни гатфар, гьак1 зулни, гад,
Сурун къене акъатдач фад,
Жигер куда, рик1 жеда пад,
Чилин к1аник пашман хьана.

Къванциз элкъвез экуь вилер,
Ахквадач мад дагълар, чуьллер,
Къайи гьавад ядач жигер,
Гунагьар ваз душман хьана.

Халкьдиз к1ур гуз, жагъай кепек,
Къирмаж я, ви паддай жендек,
Гьич санайни такваз куьмек,
Гьарамрал вун гьейран хьана.

Суру хада гьар са ка1араб,
Гунагьриз гьак1 гуда жаваб,
Ц1аю беден ийиз кабаб,
Ви дуст чилел, шейт1ан хьана.

Эй инсанар, азандин сес,
Атайла, кап1 тадани бес?
Аквада чаз чи сур, чи мес,
Дуьньяд винел мугьман хьана.