СтIал Мислимат
ПУД ЖУЬРЕДИН ДЕГИШВАЛ
Зи уьмуьрда пуд жуьреда дегиш хьана эл.
Им заз акур аламатдин ахвар я жеди.
А вахтар зи накьан югъ хьиз алама рикIел,
Я, тахьайтIа, ажайибрин крар я жеди.
Сифтедай тир беглеринни ханарин макъам,
Ахпа яна азадвили кьуьл ийир макьам.
Гила куьгьне заманади яна хьи чи кьам,
БалкIан катна, чаз гьатайбур пурар я жеди.
Амач кIвалихъ чайни шекер, я хипен ниси,
ТIарун ягъиз, вахчузавай дидед гъилин фу.
Хъукъвай лаваш, вун нез тежез, яшлу хьана зун.
Тахсир квайди жакьваз тежер сарар я жеди.
Пул я лугьуз вишен чарар, дад квачир, пичIи,
Вад виш манат са шешел гъуьр, кIатIар я ичIи.
Я ацIузмач тIуьналд руфун, вил хьанва пичIи,
Чун ламар кьаз, девир ламран тагъар я жеди.