СтIал Мислимат
ДУЬНЬЯ ГЬЕЙ!
Ажеб тир вун, чун ахвара авайла!
Гила гьар сад мидай я ви, дуьнья гьей.
Са кIвал хьиз тир,чун сад-садахъ галайла.
Гьуьрметди чун гадарна ви, дуьнья гьей.
Къвезвай сесер ягъун, кукIун, чухун я,
Кар авачиз, физ, ракьара гьатун я.
Чахъ амайди къизмишдакай катун я.
На сафунай язава чун, дуьнья гьей.
Марфадин яд гьавая фир хвал амач.
Уртах мулк, ник, туьрез ялдай мал амач.
Хзан сад яз, къал авачир кIвал амач…
Мукьвал яни ви эхир кьил, дуьнья гьей?
А сифтегьан ширинвал вахъ куьз амач?
Са гъил гъилин геле дуьзгуьн физ амач,
Вах стхадиз, стха вахаз чизамач…
Бес, гуж тушни чи уьмуьрдин, дуьнья гьей?