СтIал Мислимат
ХЪСАН ТУШ
ТIварцIиз эркек, бармак ала—итим я,
Яш чIехи яз, гьамишанда етим я…
ТIалабчивал ква, вич вичиз гьаким я.
Айибдикай кичIе тахьун хъсан туш.
Ахмакь хана хвейидаз са дерт хьана,
ТIур гайи хел файдавачир берт хьана,
Ахмакьвилер гадарна, жув мерд хьана,
Игитвилел къекъуьн тавун хъсан туш.
УстIар фида, гъилин туькIвей кар туна...
Жаван фида, вичин кIани яр туна…
Шаир фида, рекьин тийир тIвар туна…
Садбуркайни ерли тахьун хъсан туш.
Завай са кар хьана жеди, заз течиз,
Акьван хцIиз ван хкажун хъсан туш.
Жув гьи пехърен шараг ятIа чин тийиз,
Кьуру фурсар авун акьван хъсан туш.
Течиз сифте кардин бине кIевелай,
Ийиз тахьуй куьгьне кьацIар гъилелай.
Алмаздин къаш хьиз акваз вич винелай,
Муьштеридиз къараши хьун хъсан туш.
Ийир карни дуьзди кIан я, авайди,
Чкал къалаз, къен пад тахьуй ктIайди.
Вич паталди масдан хийир атIайди,
Дибдай квахьрай, ам намус квай инсан туш.
На кар кьурди жеда вакай ифена,
Ви ктIай пек на масадал вегьена.
Руьгьдин душман, вучдай вакай декьена,
Алчахвал гваз амукьунни хъсан туш.
На туькIуьрай чIуру фенд ваз цIай хьурай,
Гьар са туькьуьл крариз вун гьай хьурай,
РикIин тIалар ваз уьмуьрдин пай хьурай,
Мугьман касдин рехъ агалун хъсан туш.