Эй уьмуьр ви квел дамахда?
Къачагъ я вун чи бахтарин.
Лап ч1улав ранг ви пайдахда,
Пайчагь я амай рангарин.
Вучда вакай, рик1 сефилдай,
Ви вад югъ, вад зиндан я хьи.
Кьуьзидайни гьак1 жегьилдай,
Акъуддай гаф аман я хьи.
Аламатдин уьмуьр ви дад,
Садаз ширин, садаз туькьуьл.
Са цуьк вуна хуьда гуз яд,
Масадаз гуз тфуни кьуьл.
Ширин я ни ваз чи накъвар?
Икьван рик1ел мийир хирер!
Хъуьтуьхъай чаз къалур гатфар,
Шелдихъайни къалур мехъер.
Минетзава хамир лувар,
Цаварин дад акваз к1ан я.
Куьк1уьра гьар к1вале сувар,
Рик1из шадвал аваз к1ан я.