Дишегьлияр чи дагъвийрин хуьрера
Кимел фидач.Анал мешреб я итим,
Хесет хьанва, заз, айибмир, йифера,
Са геренда ахъагъун сайт «Лезги ким».
Дишегьлияр амач гила бейниван,
Регьят хьанва шарт1ар алай аямдиз,
Ктаб, дафтар эвезнава экранди,
Къецин юкъуз компьютердин тамамдиз.
Къекъвез жезва завай герек тарсунихъ,
Суалар гуз, къачуз гьак1ни жавабар,
Гьина? Вуж? Мус? Куьн? Вуч? Гьихьтин пулунихъ…?
Хкягъ жезва фасон, рецепт, чам, свас, т1вар.
Ахъайзава сайтар, элкъвез дуьнедлай,
Хквезва зун «Лезги кимел» дат1ана,
И кимеллай ихтилатри бинедлай
За зи руьгьдиз таъсир авун кьат1ана.
Жагъана заз «Сонет», «Ажаиб ксар»,
«Веси», «Чи маркв» рик1 гьиссерив ац1урай,
Булушкайрин гьашияйрал дидейрин
«Сифте цуьквер» атирлу ни чук1урай.
К1елзава за «Зи шиирар», чидач заз,
Лайих ят1а, галч1урзава гъетери,
Япарава «Зи манидин» ван, аваз
«Ц1ур ийизва гитарадин симери».
Декьикьаяр физва, физмач ахвариз
«П1инияр ва нагъв» к1елайла шезва зун,
Диде я зун. Шаирдин и ц1арариз
Юкь агъузна, дустар, икрам жезва зун.
«Фантазия йифен»! Бесрай ксун зун,
«За вучда кьван»- лугьумир заз, жезва экв,
«Квез я» «Рик1ин интервьюни» заз лугьун
«Пагь зи къилих!»- гьахъ я шаир, гьахъ я, эхь.
К1елиз тазва«Экуьнахъ», «Гимн уьмуьрдиз»
«Ч1ехи вахни» «Яран сувар», «Мишенар»,
«Веси», «Ахвар», «Ракъин сухта», «Хуш я заз»,
«Зун квел шад я», «Хайи чил» ва «Кьвечхелар»…
"Сулейманан чуьнгуьр" вахце лугьузвай,
Рази я зун ийизвайдахъ и таъким,
Ац1анва чахъ везифаяр, теклифар,
Гьялун патал, ша, ахъагъ сайт « Лезги Ким».
Тарихдихъни хайи ч1алан сирерихъ,
Жегьил, кьуьзуь, гьам дишегьли, гьам итим,
Таниш жедай жуьреба-жуьр терефрихъ,
Дискуссийриз ачух я сайт «Лезги ким».