Пашмандаказ ви бустандиз,
Атанва зун агъузна кьил.
Ц1ай ягъа дуст зи кафандиз,
Гуьгьуьлар шад ая билбил.
Килиг вун заз, ханва лувар,
Мад ахквадач цаварай чил.
Гьикьван къвада зи багъда хар,
Гуьгьуьлар шад ая билбил.
Акъудур югъ, къуьнерал пар,
Ажеб агъур, тежер кьезил.
Цуьк тагана кьуразва тар,
Гуьгьуьлар шад ая билбил.
Гьайиф мециз чизвач ви ч1ал,
Ахъайдай ваз зи гьал сефил.
Жегьил чанда къати жез т1ал,
Гуьгьуьлар шад ая билбил.
Са вахт къведа, куьмек герек,
Гьич садани вугудач гъил.
Чун кьведни и дуьньядал тек,
Гуьгьуьлар шад ая билбил.
Инсанни бахт - им чилни цав,
Арадава еке мензил.
Туьхуьзвач рик1 кузвай ялав,
Гуьгьуьлар шад ая билбил.
Бахтлу я вун, такваз т1урфан,
Къужахда кьаз цуьквер жегьил.
Сулейманаз ви сес дарман,
Гуьгьуьлар шад ая билбил.