Зи лезги халкь, гапурдаллай душмандин,
Муьхъ алуддай йиге жемир, герек туш.
Кц1ин вилик, лувар хазвай Ватандин,
Мет1ер ягъай жерге жемир, ам экв туш.
Хатур хамир чи вахарин, дидейрин,
Къуй абуруз накъварин дад чир тахьуй.
Кич1е жемир, акьурт1а хар гуьллейрин,
Чи гардандихъ агалддайди к1ир тахьуй.
Лезги халкьдин къадим сурар аквазва,
Накьвад к1аник атабайрин к1арабар.
Абур къени рик1ел хквез зурзазва,
Чаз къван гайи, персер, туьрквер, арабар.
Рехи хьанва дагълар гзаф дадмишна,
Стха кьейи вахан пашман манияр.
Гьикьван зи халкь къвез чакъалри бамишна!
Жегьнемдин ц1ай къужахда кьур лезгияр.
Зи лезги халкь, хкаж Ватан къуьнерал,
Ватандикай вик1егь хциз пар жедач .
Эгер къе чун акъвазайт1а мет1ерал,
Пакад юкъуз чал лезгияр т1вар жедач.