Послание некоего калугера к стихотворцем

 
К вам, о любезная братия, слово сие возглаголю,

Аз непотребный. Любити молчание ми подобает

Яко монаху, и слез о гресех изливати потоки.

Но отверзает едина любы к вам уста моя, друзи,

В мире оставшимся, лепоту мира сего возлюбившим

И непрестанно припадающим ко струям Гиппокрены.

Не об искусном плетении сладких словес проглаголю:

Паче мечтаний и соний пиитов взыскую всем сердцем

Горечь и силу креста, и юродство его и премудрость.

Меркнет земная краса и людская премудрость пред Словом,

Иже в начале бе, имже содела Бог небо и землю,

Море и вся яже в них, и Егоже злодее распяша.

Яко елень на водныя источники в полдень желает,

Сице желает душа моя грешная к Богу живому,

В тихую келлию, тихо глаголати имя Христово

И наслаждатися именем сим паче меда и сота.

Братие, слезно молю вы: Христа Иисуса любите,

В Немже есть Дух: вдохновения вашего чистый источник.

Ибо художество всякое токмо от Духа Святаго...

Честь и держава, хвала и премудрость Ему подобает,

И поклонение тварей во век, и в век века. Аминь.