Вичи тагуз, чарадавай т1алабдай,
Мукъаят хьухь, ахьтин касдив агатмир.
Авур хатур туп1аралди гьисабдай…
Мукъаят хьухь, жув-жувалай алатмир.
Къвалаллайдал гаф агакьар тийидай,
Дугъри инсан кьадай халис кимидай.
Вичин куткун кьадай зурба гимидай…
Вад камунин жув яргъа хьухь, агатмир.
Вири кьве-кьвед хьайила вич сад жедай,
Къуншидиз дерт-гъам хьайила шад жедай.
Масад виниз хьайила рик1 пад жедай…
Яргъал акъваз, ахьтин касдив агатмир.
Паб ракъуриз, вичиз къуллугъ жагъурдай,
Дуст к1еве тваз, гъибет-фитне гьазурдай.
Вич михьиз кьаз, къвалаллайди кьац1урдай,
Ахьтин алчах бед гимандив агатмир.
Вирибуру вичиз яб гун к1ан жедай,
Вичи авур меслятдал пашман жедай.
Гуьгъуьнай ам халис ви душман жедай,
Кьве мез авай гьа иландихъ агатмир.