ЙИЗ ВЯАЬЗ
Магьа хъана
К1ура ухьуз накьварихъ
Аькьюлнан гаф
Вяаьз ап1ру маллайи:
«Гьамциб йигъ хъа
Гьарсарин ихь урч1арихъ,
Дук1найирин
Аьф ап1ри чан Аллагьди.
Ап1идихьа
Гьялал ихь хиллан кубк1уб,
Аьф ап1идхьа,
Гъабхьнуш ухькан гиранвал.
Мугъахь хьайиб
Агът1ан дар, метр юкьуб,
«Ужур» дупну,
Ап1идихьа шагьидвал…»
Аькьюлнан гаф
К1урва, малла, вяаьздиъ,
Йик1ру йигъ хъа,
Ав, варидин урч1арихъ.
Гъи яв гьарсаб
Гаф ибшрияв женнетдиъ-
Дук1найирин
Аьф ап1ричан Аллагьди.
Гьялал ибшри
Узу йиз хиллан тувуб
Гьарсар касдиз,
Айиризра гъи сурдиъ.
Хъа гьит1ибк1уб,
Узуз рубкьруб тутрувуб,
Дук1ну ашра,
Чан улариан гъюри.
Гиранвалар
Дархьуз адар заминвал,
Гиранвал, кьюкь
Йивну, уьбхюз хай даршул.
Хъа гъап1урин
Яманнугъвал, пис футна,
Гъак1ну к1ури,
Аьф, йип, фици ап1уз шул?
К1урава, хил
Хъап1ри, малла, вяаьздиъ:
«Мугъахь хьайиб
Юкьуб метр агът1ан дар…»
Гьугъубжвурзуз,
Майтихъди а му сурдиъ
Чав гъап1у гьам
Ужудар, гьам пис ляхнар.
Гьякь кас гъахьнуш,
Дугъу накьвдиз гъахиди
Инсанарин
Юк1варин зур пашманвал.
Пис кас гъахьнуш,
Накьвдиъра агьрар хьиди,
Усал касди
Гъабхиди чан усалвал.
«Ужур» дупну,
Ап1идихьа шагьидвал…» -
К1урва, малла,
Гьарсарин майтин к1улихъ.
Гьаз дубградар
Дюн`яйиин хаинвал,
Эгер шулуш
Вари ужудар мици?
Йипа, фици
«Ужур» пуза гьякимдиз,
Дашбаш бисуб
Гъабхьнуш кьюбпи кесп дугъан;
Уьмур хъап1ну
Жигьилган гьярамзади,
Кьаби хьиган,
Ап1урайириз гъудгнар?
«Ужур» дупну,
Шагьид, йип, фици хьуза,
Ичкийи жан
Гъубгнуш сарин вахтсузди?
Уж`влиинди,
Йипа, фици улхуза,
Эгер дугъу
Уьмур хъап1нуш ягьсузди?
Йипа, фици
Ужур пуза, я малла,
Чан бабкьана
Уьрхюз дархьи усализ?
Чаз ккунибси
Жил`ин учв лицру вахтна,
Дугъаз чахъра
Аьхир хъайиб аьгъдайин?
Аьдат ву, ав,
Пувал ухьуз накьварихъ
Аькьюлнан гаф
Вяаьз ап1ру маллайи:
«Гьамциб йигъ хъа
Гьарсарин ихь урч1арихъ,
Дук1найирин
Аьф ап1ричан Аллагьди.
Ап1идихьа
Гьялал ихь хиллан кубкьуб.
Аьф ап1урхьа,
Гъабхьнуш мугъкан гиранвал,
Мугъахь хьайиб
Агът1ан дар, метр юкьуб
«Ужур» дупну
Ап1идихьа шагьидвал…»
***
Дисурдар пну
Гъак1идар вари сабси,
Мап1ан, малла,
Уву узкан гиранвал.
Ужур касдиз
Руг ибшричаз, бамбагси,
Хъа пис касдиз
Дибрихъричаз сикинвал.