УЬМРИАН Ц1АРАР
Сабур ап1ин, фикир ап1ин, эй инсан,
Кьюб гафнан арайиъ убшру яв уьмур –
«Гъахьну - гъак1ну», гьушишра фукьан йисар…
Амма уву вува фукьан такабур!
***
Тикмиш дап1нава ичв гъулаъ
Варт1ан аьхю хулар-гъала.
Фурс мап1ан гьич, хьиди дурарра гъюрдар.
Му дюн'я гьич сар касдизра гъубзундар.
***
Пагь! Сар касди ап1уйи гафар уччву...
Вушра гьархну халкьдиз магьа дугьан ччвур.
Хъа тмунури, ккебехъну, гъап1ну ляхин –
Сад йигъ шулдар, зат думу к1ваин дархи.
***
Алдап1ури гьякьналан парс,
Уьмри гьамциб киври а дарс:
Кьадар адруб хьибган тямягь,
Дургру инсандин намус, ягь.
***
Сари Ватан тувру масу –
Ухьу дугъаз к1урхьа жасус.
Намус дипну,гъуллугънан стул
Кадабгъру кас ву намуссуз.
***
Кьяляхъ хъади халкьдин агь, гъугь.
Гьаз вуяв, кас, думу гъуллугъ?
Гъуллугъ дар абайин ургам,
Увут1ан адарин мургар?
***
Страусси, гъумраъ ивну к1ул,
Жин духьнава халкьдихьан гьаз?
Ухди-кьанди сабур т1убк1ур,
Кюмек хьибдар гъум яв машназ.
***
Мап1ан уву яв аваза,
Шулвукан дарш мердимазар.
Вушра уву аьхю аьриф,
Жарари ап1ри яв тяриф.
***
«Игит вуза!» пуз гьелелиг
Гьялак махьан, «к1убан» юлдаш.
Увуз халкьдин гюзгдиан лиг –
Белки, рякъюр дид'ан угъраш.
***
Ап1урава гъи угъривал,
Гьякьваликан к1ури гафар,
Амма гъамциб ву дугъривал:
К1ан`ан-к1улиз вува т1афал.
***
Гьидипну, даттлиси, мухур,
Гъудубгъну сар касди улхуз.
Амма зиълан гъабхьиш сес «деъ!»,
Дицирикан шул кьяши пеъ.
***
- Фу ву гафар? Гафар фу ву,
Дурар дик1рур, к1урур учв вуш
Машнаъ адрур ягь, намус, нач?
- Анжах сесер-гьярфарин гъварч.
* * *
- Фу ву гафар? Гафар фу ву,
Эгер к1урур вуш намуслу?
- Кьимат адар дугъан гафназ,
Ижмивалиан ву алмаз.
* * *
Марччлихънин бай
Гъахьиш паччагь,
Дугъан кьяляхъ
Гьарган шул агь.
Гъахьиш аба
Девлет хъайир,
Паччагьра шул
Гьюрмат айир.
***
К1ваинди гъибт: гъизил а пну,
Яни гизаф девлет айир,
Бахтавар дар.
Аьяндри аьгъяди гъапну:
«Айибдиин рази вуйир
Ву бахтавар».
***
Лапра хам духьнава, инсан,
Гъулугънакан дап1ну ахур.
К1ваинди гъибт халкьдин мисал:
«Шавгьри гъабхуб мик1лу гъабхур».
***
Гьюл адрабц1руганси нири,
Абц1руб дар инсандин тямягь.
Сариз шлуб дар дюнья вари,
Мудубган гьа, инсан, яв ягь.
***
Адамдин улихь чан к1ул ис
Дарап1ур гъахьну сар Иблис.
Му гафарин гьякь мяна бис:
Иблисдикан уж`вал шул шлиз?
***
Паршин хъап1ри, к1ура увуз:
«Вува, дугъридан, пягьливан!»
Гъапну к1ури даждиз гьяйван,
Шулинхъа ибар жин ап1уз?
***
Намуслу кас хъугъган увухъ,
Рази вува яв куч1лиин.
Дугъан дар гьа, яв ву язухъ:
Аьлхъюра инсанар ув`ин.
***
Духьнайиган инсанар уч,
Улхурва, вуйиси даттуч.
Ттадабгъиш увхьан афтафа,
Ккудук1у яв аьхю гафар.