Бубайрилай аманат тир,
Ша агата, Яран сувар!
Ц1игел хьанва, гьисабзава,
Вал вил алаз йифер, йикъар !
Гьазур жезва гьар са лезги
Ви къаршидиз, Яран сувар,
Умудлу я, гъида вуна
Берекатлу марфар, ракъар!
Яран сувар, Яран сувар,
Къацу ая ник1ер,ч1урар!
Гъваш синияр ширинлухар,
Рангара тур какаярни,
Пайдай ирид к1вализ паяр,
Ац1айбур хьуй хунчаярни.
Тип1ихра хьуй яран кьалар,
Мягьле-мягьле - зурба к1анч1ар,
Михьибур хьуй рик1ин къастар,
Палдумарал элич нафт1ар!
Яран сувар , Яран сувар!
Ялавлубур хьурай ц1аяр !
Пагьливан хва хьуй симинал ,
Ц1егьрен суфат -квасад чинал,
Зуьрне, далдам- шад деминал ,
Илигдайвал зарб кьуьлуьнал!
Тапшуругъар гьазура чаз,
Гатун, зулун чирна гьава,
Ц1инин йисуз багъда, сала
Гзафара емишни майва!
Яран сувар, Яран сувар!
Чи шадвилихъ авач кьадар !
Бубайрилай аманат тир,
Ша, агата, Яран сувар!
Ц1игел хьанва ,гьисабзава
Вал вил алаз йифер, йикъар!
Март 2016