Вил хьанава зи бубадин гъилерихъ.
Нагьакь кlвалах авурла зун гатадай,
Зи кьилелай, темен гуз кап алтадай
Вил хьанава зин, бубадин гъилерихъ.
Вил хьанава зи бубадин вилерихъ.
Зи писвални, хъсанвални аквадай,
Къалуртавур гьич ацlана накъвадай
Вил хьанава зин, бубадин вилерихъ.
Вил хьанава зи бубадин кlвачерихъ.
Гьич садрани агъуз тахьай метlерал,
Хкадариз кьуьлер авур мехъеррал
Вил хьанава зин, бубадин кlвачерихъ.
Вил хьанава зи бубадин гафарихъ.
Тербия гуз, эхтилатар рахадай,
Маса касдин я кефи гьич тахадай
Вил хьанава зин бубадин гафарихъ.
Вил хьанава буба къвалав галазич.
Ваз дуьз меслят лугьудай кас авачиз,
Жувахъ артух рикl кудай кас амачиз
Вил хьанава зин рикl алай бубадихъ.