Экуьнин гар къугъвадайла къавахдал,
Цуьквери кьил хкаждайла яйлахдал,
Гимишдин квар гваз экъеч1да булахдал,
Тагьирхуьруьн рушар - азиз зи вахар.
Сад акурла, сад рик1елай алатда,
Серсер жеда, къалабулух акатда,
Лугьудай гаф жегъидач - кьил акахьда,
Тагьирхуьруьн рушар - азиз зи вахар.
Куь гуьрчегвал и алемдиз машгьур я,
Дамахар гвач, анжах намус, сабур я,
Куьн лезгидин к1валин асул абур я,
Тагьирхуьруьн рушар - азиз зи вахар.
Гъиле кьур кар эхирдиз кьван акъуддай,
Вичин к1валихъ берекатар агуддай.
Кашар-мекьер лап яргъариз акъуддай,
Тагьирхуьруьн рушар - азиз зи вахар.
Вуч себеб я хци хьун куь кьат1унар?
Вучиз икьван милибур я акунар?
Деринбур я куь кхьинар-рахунар?
Тагьирхуьруьн рушар - азиз зи вахар.
Самур тамун жегьверрикай тушни чун!
Кьисметна чаз булахрин яд адан хъун,
Т1ебиатди гана паквални кьат1ун,
Тагьирхуьруьн рушар - азиз зи вахар.
07.01.17
Гюзел@
фото из семейного архива