(«Танъ йылдызы» ансамбли иджра эткен йыр)
Сенсиз гонълюмде эбедий бир кузь,
Сенсиз къаранлыкъ, булутлы эр кунь.
Сенсиз бу дюнья ят олды манъа,
Сенсиз юрегим къаврула, яна.
Не ердесинъ сен, севгилим меним?
Не ердесинъ сен, кунешим меним?
Кель къыздыр мени нурларынъ иле,
Къувандыр, алдат сёзлеринъ иле
Багълама:
Амма билем мен, бир кунь
Келип кечер бузлу кузь.
Билем, билем мен, бир кунь
Келип кечер сувукъ кузь.
Гъайып олур кедерим,
Пейда олур мелегим.
Гъайып олур кедерим,
Мен де санъа келерим.
Бакъ сен, таркъалды булутлар кокте
Ве кельди баарь меним гонълюме.
Мен къанатландым, мен кучьлю олдым,
Семанынъ айы, йылдызы олдым.
Не истейсинъ сен, севгилим меним?
Не беклейсинъ сен, севгилим меним?
Сен иле энди мен ич олмайджам,
Гуль, чечек киби энди солмайджам.
Багълама.
Март 19, 2008 с.