. ХЪИТКЬЕРДИН ЦУЬК
Я цуьк хьана, битмиш хьайи цуьк,
Экъеч1нава раган хивел.
Ни мажбурна, гьик1 хьана, гьик1
Акъатна вун суван чилел?..
Аби, вили какахьай ранг
Алай, на алук1на лечек.
Ви к1алубдин шумал тир танг
Аквазва хуп1 иер, гуьрчег.
Пакаман нур,- ракъинин пай,
Кьабул тежез, къузадик кваз.
Нисен вяде,- ракъини кузвай,
Зегьемдик хьун, - суза я ваз.
Рагъданрикни, серин шагьвар
Жеда, гена, инсаф авай.
Шумал буйдиз, тежервал т1ар,
Уф гуз , гьарнихъ, ян гуз тазвай.
Уьмуьр тухуз рагара нягьс,
Чанда гьатиз зурзунни зуз.
Дурум гунин ч1угвазва бягьс
Зериф тандиз хер-кьац1 тагуз..
Лигим хьана суваз хас тир
Къилихдикди, хатавал кьит1,
Девранзава кьегьал кас хьиз,
Чеменрикай ханвай хьиз рик1...
Гьар вуч ят1ан, гарун хура
Гьатна, раган хъиткьердиз рум
Гана, тунва секин пуна.
Тирвиляй вун цуьквед тухум...
1993й.