Каятотсь судос прякань чине.
Мон панжинь сельмень ды мизолдан.
Тантейстэ пекенек пештьсынек!
Авань пряканзо тантейть. Содан.
Айгинь вальмасто стака коцттнэнь
Ды молинь каштомонть икелев.
Сон течи пси. Содонзо потсто
Качамось оргодсь верев-верев.
Стамбарнэ панжовсь стака кенкшесь,
Ды совась кудос ёвксонь валдокс
Лембе мизолксонь апак кекше,
Чевтестэ ванозь паця алдо,
Авам.
Панжизе равжо каштом кургонть
Ды икелензэ чаразь чары.
Прякань чинесь пештизе кудонть,
Мон сельгень нильнян. Ёжом паро.
Вейсэ озынек морганть экшес.
Сускинь пряка апак кавтолдо.
Кода мон те эрямонть вечкса!
Авань пряканзо тантейть. Содан.