Дунен юкъе уллаш йолча Макке,
Раббиуль-авваль бетта шийтлаг1ча ден,
Дуне къоагдеш баьлар керда седкъа,
Белгал долаш ди дар массанен.
Малх хьалкхетлаьхь дуне сийрдадаьлар,
Нурах диза латтар Х1ашим ц1а.
Даьла Элча укх дунен чу ваьлар,
Ший Кхеллачун суждане ваха!
Х1ашим ц1енах, Къурайш тайпан волаш,
1абдул-Мут1алиб во1 1абдуЛлоах1,
Иброах1има ц1ена дын т1а волаш,
Вар цун да (рахьИмах1умуЛлОах1).
З1амига волча хана денз дукхаг1везаш
Ше мел волча къонгел даь из вар.
Наха везаш, наха юкъе лоарх1аш,
Хоза г1улакхаца массаза белгал вар.
Цкъа цхьан дийнахь Шаме ваха волаш,
Хьаьнал рузкъа доаккхаш, базар еш,
Лазар кхет цун, Даьла кхеле верзаш,
Ше вийзача наха эшам беш...
Кхалхар хул цун Сийдола Мадинате,
Ткъаь пхи шу мара даккхац дунен т1а цо.
Ший во1 ца гуш вода из, дуне дите,
Наьна керахь дуташ миска бо...
Сийдола Аминат яр Элчан нана,
1абду-манаф ц1енах, Вах1аб йо1.
Сийлахь волча Дала къоаст я яр из
Шийна валарца ше мо кхы воаца во1!
Аминат яр наха езаш, лоарх1аш,
Сийдолча наьха ц1ена овлах янна.
К1аьда йолаш, хоза куц-сибат долаш,
Мут1ахь йолаш яр из ший даьна,наьна.
Рузкъа нийсалу цун Абдуллах1ац,
Барт-безаме болаш, хоза бах.
Д1аьха хилац ираз фусам-даьца -
1оажало д1авуга 1абдуЛлоах1...
Т1ехьа дика доацаш даг1ац во а,
Берах кхийна йолга гучадоал.
Кер чу доалаш белгал хул из бо а,
Шаме юзаш сердал цунгара йоал.
Дукха белгалонаш яйта цун Дал,
Из бер къоастдаь доларг хайташ Ше.
Хала доацаш, атта долаш хьал
Аминатаг, хьалэца Шифас бер.
Мухьаммад, ма ираз да хьа наьна!
Даьлера салот-салам хилда хьона.
Кхы ц1аккха хургьяц укх дунен чу ян,
Хьо мо Къонах хилар ираз хан!
Даьла Элча ялх шу даьнна волаш,
(Даьлера салам хилда цун) Мадинате
Наьнаца вода, да д1авелла воалача,
Цига ле нАна, лазаро къал йите...
Нана... ма лоарх1аме дош да "нана"...
Са мел доала х1ама наьнах хьог.
Наьнага бер хьона кхайкаш хозача хана
Ма ч1оаг1а дийлха хургда из хьа дог...
Иштта миска кхийра хьо, МухьаммАд...
Даьлера салам хиларг, г1ийла бо,
Те1а волаш, к1аьда, сатем болаш,
Наха хьайгара б1арг ца дайташ во.
Кхувш хьо воаг1аш ва хьо наха везаш.
"Тешамевар" , аьнна хьох ц1и йоакх.
Хьа г1улакхах, хьаькъалах нах хьегаш
1а дунен чу цхьа ха-зама йоакх.
Саг хьакхоллар бахьан лохаш волаш,
Хираъ, лоам т1а вувлаш, хьо цхьаь вус.
Малайк дос хьона, нуро го баь долаш,
"Икъроаъ" , аьнна хьога амар дос.
Цига хувцалу хьа дерриг вахар.
Ц1ена Ислам ДАла хьона хьех.
Дукха везаш лелваь хиннача наха
Мехках доаккха хьа сийдола дег1.
Вицваь витавац хьо Дала, тесса,
Мухьаммад, хьона яьздаьр дикаг1а да,
(Даьлера салам хилда хьона)Малайк десса
Миърадж бус хьо Дала хьаьша ваь ва.
АльхьамдулиЛлях1, хьо вайта тхона!
Мухьаммад, хьо вийца саг варгвий?
(Даьлера салам-моаршал хилда хьона)
Хьол дикаг1а х1ама ц1аккха кхелладий?
Аллах1о т1ехь хьона салот дул,
Хьо Шийна дукха везаш хиларах,
Керасто кхыметтал тешал ду
Хьо сийдолаш Пайхьамар хиларах.
1аьржача бийсан къаьга боаг1ача беттал
Дуккха хозаг1а яр хьа нуре юхь.
Хьох хьайоаг1аш хиннача хозача хьажах
Нах хьа лара т1а баьнна т1ехьа ух.
Хьа юхьа т1а дувлаш дола хьоцар
Наха дувца, жовхьарех тардеш.
Тха дукхвезар, безам совбул хьоцар
Хьехамашкахь хезача хьона куцдеш!
Хьа барзкъах т1ехь наха беркат доал.
1а т1аювх я хинна йола аба
Наха ютташ, цог1ара хий 1о1овдаш,
Дора хала унахошта дарб.
Ма дукха дийлхад из хьа миска дог
Хьай уммат цу Даьлагар дехаш...
Са доалаш а бАла бара хьога
"Уммати, йа уммати" , яхаш...
Ма ч1оаг1а дукха везаш ва хьо тхона,
Тха сийдола нуре Мухьаммад!
Даьлера салам-моаршал хилда хьона.
Хьа вахар тхона хьокхам хинна латт.
Ма сагота я дунен чу хьо воацаш...
Сатувс дего ч1оаг1а хьо б1аргагу.
Дала ц1аккха хам баь варг а воацаш,
Ма ираз да цкъа хьо г1анахь гор!
Оалаш ма дий, шийна дукхаг1везар
Ялсмален чу цхьан хургволаш ва...
Иштта дале, (тхона хьо ч1оаг1а веза!)
Дала аьнна дале, вай в1ашаг1кхетаргда...