Д1аьха дукъах йолхаш ера,
Бирса, 1аьржа вагонаш,
Тахан къиза бийса ера,
Къаман дог делхадеш.
Дахчан пандар бе боалаш,
Ваг1ар цу чу воаккха саг,
Моцалах кер 1увг1аш,
Йоацаш кхала х1ама баг.
Г1ийла мукъам болабир цо,
Бекабеш ший дахчан пандар,
Наьха синош сомдаьхар цо,
Иллийца из Даьлага кадар.
Эшае г1ертар бирса моцал,
Уйлаш Даьхенгахьа лестар,
Юхе ейтацар къиза шелал,
Цу уйлаш тха дегаьш хьестар.
Ноаношка ма кхайкхар бераш,
Фиг буртиг мукъа тхон ба,
Царга хьежаш, дегаьш эт1аш,
Ноаной белхаш легар д1а.
Хьа1ингашка даха бераш,
Делхаш ноаношка хьежар,
Из сурт ла ца могаш, ч1ехкаш,
Къоаной пенага берзар.
Эзделах ца боха г1ерташ,
Мехкарий сатийна бар,
Сий довчул, 1оажалга кхайкхаш,
Сабарах ца бохаш бар.
К1антий салташт духьал бувлаш,
Ла могацар ямартло,
Ц1ий шоай мехкдеш, лаьтта легаш
Йора цара инкарло.
Мехках даьха дугаш дар тхо,
Цул боаккхаг1 бала бий,
Халкъан дегаь теха бола пхо,
Наха ц1аккха бицлургбий?
Жа 1ул санна цхьана лаьхка,
Сибарег1а 1окхайсар,
Цига халонца ха вай яккха,
Чилла санна дег т1а ессар.
Ахмад Шадиев (24.07.2015)