Уюнбаз Зул, к1анивал чун къугъурда,
Шумуд перде, шумуд жуьре къалурда!
Пад яру ич тарцин кук1вал юзуриз,
Гимишд гъалар цавун тагъда чук1уриз,
Яр-емишар к1ват1из чуьлдиз эвериз,
Тух тежедай шикил къалад вилериз.
Наз либасдал алагуьзли дамахиз,
Ашкъи гъида бегьер вахчуз, к1валахиэ.
Чирдач садран вуч ават1а шеледа,
Гагь хъуьреда, гагь ав ягъиз ишеда,
Рагъ алцифриз гуда гагь чим бертериз,
Инад кьада пака назик цуьквериз.
Кьежей цифер къатадда гъиз чилерив,
Къизилд парча кук1вариз гуд селлерив,
Бижгъер чухваз акъудда гар,чукуриз,
Чан алайд кьван гьатда далда жагъуриз.
Ц1ийи йисак ч1ехи умуд кутуна,
Лацу яргъан гвай стхадихъ ягъуна,
Т1ебиатдив ял ягъиз таз гат1униз,
Пешни тадач кьец1илариз, хут1униз.
Сегьнедал вахт устадвилелд ракъуриз,
Акакьда эл хъуьт1уьз къарши гьазуриз.
Успагьивал успат тир гьар легьзеда,
Уюнбаз Зул, гуьрчег я вун Кюреда!
Октябрь 2017