Къапуны къакътым. Кечмишни къувдым.
Эр бир тарафтан диварлар къурдым.
Янъы эскилик (ривает) энди язаджам,
Аят акъкъында бойле айтаджам:
«Кедерим, агърым — сувгъан (сёнген) янардагъ,
Багъладым онъа къызыл боюнбагъ,
Эр улу гъалип — бу джанлы нишан
Тек агълама ич! Омюрге ишан!
Такъдир ёллары — якъын узакълыкъ,
Онынъ куньлери — ярыкъ къаранлыкъ.
Дюньяда эр шей — чин оксюморон,
Тек рухтан тюшме! Ирадели ол!
Гонълюне къуванч урлукъларын сач,
Юрегин бахткъа шубеленмей ач,
Ёрулгъан къушны чыкъарып йибер -
Сонъ гузелликке фелегинъ дёнер!»
Март 26, 2018 с.