I
ГIалгIай аьнна даьд вай нанас.
Даймохк бахьан дахаш да.
Хестаеш вай Нана-Кавказ,
Вахар цунна дIалуш да.
Лорадеш вай нана-лаьтта,
Бокъо къувсаш латташ да.
Иллеш доахаш наьна метта,
Къаман сий хьалкхоабаш да.
ТIехьаоалар:
Дека, дека, гIалгIай илли,
Дуненца яхийта оаз.
Нагахь, хозагIа кхы дале,
Из а хьа метта тхона хоз.
II
Лакха я Кавказа сийле,
Цунца цхьана – ГIалгIайче.
Укха дунен тIа дац кхы маьхе,
ЛархIар мара Наьначе.
ГIалгIайех воаш дирах нанас,
Даймохк бахьан дахаш да,
Цунах хеташ доаккха ираз,
Вахар цунца дусташ да.
ТIехьаоалар:
Дека, дека, гIалгIай илли,
Дуненца яхийта оаз.
Нагахь, хозагIа кхы дале,
Из а хьа метта тхона хоз.
***