Хкаж хьанва къизилдин рагъ цаварал,
Чилиз гузвай чимивал,нур гужлу я.
Хайи хуьрел,зи рикl алай суварал,
Чилериз рагъ,зун кlанидаз буржлу я.
Вун галачир кlандач я заз цавни рагъ,
Ашукь я зун ви къаматдал-абурдал.
Бегьер гъайи са багъ я вун кьакьан дагъ,
Гьамишанда рахада вун сабурдал.
Гьич садахъни рахадач я къана вун,
Камаллувал,уьтквемвал ваз несиб я.
Гьахъсуз лагьай гафарини кана вун,
Къе девлет ваз хьанач вун са кесиб я.
Девлетар ваз я кlан хьанач садрани,
Хайи чилел ва дагъларал дамахиз.
Кьибледихъ вун элкъвез хьана вадрани,
Такабурвал къалуриз на кlвалахиз.
Виридаз вун хуш жезва дуьз рахайла,
Геж хьанва къе тунва на зун гьалкъада.
Муьтlуьгъ гьикl жен бубади ваз тагайла,
Къакъатайбур чи гъавурда акьада.