ЖЯМЯАЬТ
Сариз а…
Тмунуриз адар…
Адрури учв айирси улупура…
Айири учв – адрурси…
Гьан, фици даршиди шул девлетуна касибур?
Айири уьбхюра,
адруриз йивури тягьна.
Адрури гьюбхра,
жарарин тягьнайихьан гьилигури.
Айири гьан ап1ура,
адрур алжагъура
адруриинна адарди машнаъ ранг.
Айирин миллиондикан туву агъзур рябкъюра,
адрури чан важдикан туву хьуц1ур рябкъюрадар.
Гьамци арайиз гъюра жямяаьт
адрурин кюмекниинди айирин уьбхюри гьюрмат.
Гьамци арайиз гъюра дин
адрурин зегьметниинди
айирин хъана ап1ури артухъ…