(васкет)
Со ваьхав сай заманца гIа боахаш,
Вахаро хьалучох тоъам беш,
Гаьнаш дIаювш, цкъаза лаьтта оахаш,
Сай кулгаша даьчунна хам беш.
Ваьхав вашаш, дега тоам а хулаш,
Маьрша деча керда доагIа ди.
Машар лехаш, Даьлегара дехаш
Ца ялийтар цо са мехка цIи.
Беркат лийхад – сайна, сай къаманна.
Аьттув хилча, эшачоа гIо даьд.
ТIехьа удаш хиннавац рузкъана:
Хьарам-хьаьнал охца къестадаьд.
Хьаькъал лийхад, пайда хилба аьнна –
Коара ваьнна, аренаш тийхкай.
Цаховр хайча – хулаш дог гIоздаьнна,
Аз Iилмана къайленаш лийхай.
Ваьхав даима со кийча волаш
Iунал этта латта Даймехка.
Даьхенцара уйла чIоагIа йолаш,
Цунна зене долчоа никъ бийхка.
Хиннав даима со нигат долаш
Сай лар йита, сайга дулур даь,
Даьхе тоаеш ваха уйла кхоабаш,
Цу тIехь сайна моллагI эшам баь а.
Кхебаьб дезал – наха гIонча болаш,
Эша напах царна Iалашдаь.
Хур уж тIаккха са цIи шоашка лорош,
Из ца йоае – шоашта могар даь.
Кхеллаб кхоллам аз се вусаргволаш
Шун дегашка, цунах ловца баь,
Сай кхолламца оаш се вувцаргволаш –
Сайна цунах тIехьле маьх тIа яь.
Ваьхав, ва нах, шуца тайна волаш,
Эздел гойташ, бехках лоралуш.
ТIеххьара со оаша накъа воаккхаш,
Со Даьлера оаша вехалаш.
27.02.20.