Мана: «Ва эгер куьне Аллагьдин няметар гьисабиз
хьайитIа (алахъайтIа), квевай абур гьисабиз (кьадар
чириз)жедач! Гьакъикъатда, Аллагь – гзаф
багъишламишдайди, гзаф регьимлуди я!». Къуръан I6:I8
Ваз шукур хьурай алемрин Рабби,
Ви патай я чаз няметар вири.
Герек затIарив авуна таъмин,
Рехъ къалурна чаз - Ктабдив якъин.
Я Регьимлу тир, я Жумарт Аллагь,
Гьикьван къадирсуз я чун - Ви лукIар.
Ви суваб туна, хкяна гунагь,
Гъилерихъди жув ийизва кукIвар.
ЯтIани чIехи Регьим хас я Ваз,
Тешпигь авачир дуьньяда вичиз.
И гьакъикъат мад субут жезва заз,
Кихлигайла за атIанвай рекьиз:
Ваз яб тагана, гьевесрихъ физвай,
Асивал ийиз гьикьван рахана.
Регьимлу Аллагь, Вуна зун хуьзвай,
Заз лайихлу тир жаза тагана.
Чирвал авачиз зун Вакай рахаз,
Ви ажугъ гъидай суьгьбет ийизвай,
Амма Ваз зун чиз, зи крар акваз,
На зи гунагьрал перде вегьизвай.
За ийизвачир На ферз авурди,
ШейтIандиз яб гуз, Вахъай элкъвезвай.
На гузвай заз гьич тIалаб тавурди,
Ви Регьим даим геле къекъвезвай.
За Ви дуьз рекьел вегьизвай къванер,
На зи рекьелай цацар алудна,
Ваз акси патахъ физвай зи кIвачер,
На элкъуьрна, дуьз рекьел акъудна.
…Ви регьимдикай за фикир ийиз,
Регъуь жезва заз, вилер ацIузва:
Ви хъсанвилер са-сад рикIел гъиз,
Ви Жумартвал за гила кьатIузва.
Гьар са юкъуз Ви нямет къвезва чал,
Ви ризкьи незва, нефес къачуза…
Чи патай гунагь ахгакьзава Вал,
На багъишзава, На гъил къачузва...
Регьимлу Аллагь, На куьмек це чаз,
Лайихлу къайда ибадатдай Ваз,
Вун рикIе аваз, Вазни шукур гъиз,
Ви къадагъа – таз, эмирар ийиз.
Гьа икI жеда Ваз сидкьидай шукур,
На багъиша чаз гьамдрай Ваз тавур!