(триптих)
(Къарабагъдин вакьиаяйриз)
1.
И йикъара азабри зун акажна,
Хажалатди чан кармашна агажна.
Зун хьтинбур шумудни сад сефилар
Хьана, акваз къакъатзавай жегьилар –
Алатнавай керквечдаллай залпандар,
Кьиле авай инсафсузрин къурбандар.
На лугьуди физвай рикIиз чукIулар,
Акъатдайла сасад-сасад цIакулар.
МасакIа тир, лекьрен лув гун дегиш тир,
Адаз вичин юн амачир вердиш тир.
2.
Куьз я халкьдиз вилер пичIи агъаяр,
Чилер-цавар бес тежезвай хахаяр ,
Куьз я абур келледа макь авачир,
Ракьун руфун туькIуьрдай ракь авачир ?!
Пай хьанайтIа са кIус кьванни камалдин,
Махарик квай данарбандин-гачалдин,
Белки абур азгъунвилер алатна,
Секин жадай невс бедендай акъатна.
Нагъв жедачир мад дидейрин вилерал,
Ясдин яйлух шек свасарин кьилерал .
3.
Я Садаллагь, килиг вун зи арзадиз,
МуьтIуьгъ лукI я вуна гузвай жазадиз !
Гьар са карда вун чIехи я, вун гьахъ я,
Ви къудратдихъ, ви регьимдихъ чIалахъ я.
Аси туш зун, шукур хьуй ви кьадардиз,
Кьисмет къачуз физвай кас туш базардиз.
Первердигар, рехъ гузвайди бахтуниз,
Акьулни це хкаждайдаз тахтуниз !
Халкь сагъ жеда, чпик тIимил гунагьар,
Акьуллубур хьайтIа чилел пачагьар !