Хабар тушир им вуч хиянат хьана,
Дидедизни бегьем хажалат хьана.
Пуд югъ хьанва Масан к1вализ хтанвач,
Хабарар кьаз мукьва-кьили атанва.
Сейдадизни и кар гил эсер хьана,
Жува жув нез шехьиз рик1е хер хьана.
Бат1улди вич тирди ада гьисзава,
Гъам-хифетиз вичизни лап писзава.
Халкьари сив гьахъ-гьисабди сагьиб я,
Адалатни хьайит1ани насиб яз...
Яваш-яваш жемят кимел акъатна,
К1ват1 хьайила, гьа ихьтин са меслятна:
- Гьар са инсан авур карди сагьиб я,
Адетарни чи уьмуьрдин са диб я.
Жаваб гуда бат1ул хьайи инсанди,
Яб тагана ажугъдизни, бугьтандиз.
Сабур авун акьулдин са лишан я,
Вичин ери виридалай кьакьан я.
Таб я лугьузвач вилериз такурди,
Беябурда тахсирар квай гапурди.
Йисаралди гьахъни нагьахъ гьуьжетар
Жез хьайила, арадалла адетар.
Адетдивди ахъсакъалар рахазва,
Пакадин къан гьал абуруз аквазва....
Халкь гьуьжетриз акъатнавай арада,
Салам гана кимел ашукь атана.
Къал-макъалди бине вуч ят1 чир хьана,
Муминазни и кардикай сир хьана.
Мидядилай гьуьрмет авун хъсан я,
Гьуьрмет авун кьегьалвилин лишан я.
Ажиздал аслан хьайиди кьегьал туш,
Дуьз лагьайт1а ам я гьахъ, я гьалал туш.
Т1алабзава Муминавай жаваб гун:
"Ахъай ая кар хьайивалди, яб гун".