Ракъура ктаб

 
Ви ктаб акъатна,хьанва заз малум,
Зазни сад ракъура,Тамила ханум !

Шиират зи ем  я, зи къафун –къатух,
Шад ая на зи рик1, руьгь ая зи тух.

Муьгьтеж  яз тамир зун ц1ийи ц1арарихъ,
Саил хьиз фу т1алабзавай варарихъ.

К1ан я заз шиирар квачир таб-гьилле,
Ви ктаб вахтунда гьатнайт1а гъиле,

К1елдай за квахьдайвал жуван рик1ин т1ал,
Дуьньядин гьалари гъанвай дарискъал.

Аквадай заз анай Саядан дерт-гъам,
Хиневи  Зайнабан чангудин макьам.

Миграгъ руш Къемерни-сунайрин сердер,
Хуькведай  зи  рик1ел , к1елна ви бендер.

Бажарагъдин кьулухъ пехилвал жеда,
Ам ч1улав илан хьиз геле къекъведа.

Карванди вичин рехъ фидайвал гьалда,
Тартайри элуькьиз нубатсуз къалда.

Анхил Мариназ хьайи туш кич1е.
П1узарар  цванайт1ан, давамнай пеше.

Аллагьди ганва ваз шииратдин пай.
Бязийри  гьак1 ч1ана гузва  сивиз къай.

Гьеле за кьат1узма , хьанвач зун гижи,
Жегьилриз кьимет гун рехидан буржи.

Къелемдин дустуниз, тушт1а ваз азаб,
Ракъура, ракъура  жуван са ктаб.