Тавсия хьуй квез, аялар,
Къарагъайла экуьнахъ гьар,
Физзарядка ийиз хьурай,
Гьарсада им вердиш кьурай.
Гьерекатди гумрагьарда,
Къвазнавай ракь михъед кьада...
Ша, аялар, куьн агата,
Къалурун за ийир къайда.
Сифте кьилин везиятда,
Са кlус жуваз азиятна,
Кlвачер къя тlимил фирягь -
Хкадариз кlандай саягъ.
Сад лагьана - гъилер вилик,
Кьвед лагьана - цавуз, винихъ.
Пуд лагьана - вегь къуьнериз,
Кьуд - гьазур тир хьиз кьулериз,
Лекьре хьтин луварар яхъ,
Ахпа мадни юкьал хутах.
Гьа икl ийиз мадни тикрар,
Гьар гьерекат ая кьудра.
- Сад, кьвед, пуд, кьуд,
Сад, кьвед, пуд, кьуд...
Сад - гъилер твах дуьздуьк вилик,
Кьвед - цавуза абур тикдик.
Пуд - къатарна къуьнерал гъваш,
Кьуд - ахъая, лув гана вач...
Хъша кьилин везиятдал,
Яхъ гъилерив жуван кьве кьвал.
Ацlукь - къарагъ, ацlукь - къарагъ,
Аку гьикl куьн жеда гумрагь!
Сад, кьвед...сад, кьвед...гъилер къвалал...
Кlвачел къарагъ, ацlукь цуквал.
Сад, кьвед, пуд, кьуд, сад, кьвед, пуд, кьуд,
Нефес къачу...гъилер хкуд...
Гьар экуьнахъ хъая тикрар...
Мад авайд я гьерекатар...
17.07.2023