Са сеферда са мехъерик
Къалин к1ват1ал рахазвай,
Жегьилари кьуьзуьбрувай
Адетрикай жузазвай.
-Вахтар физва, жезва дегиш
Чи ацукьун- къарагъун,
Чан бахаяр, т1алабун я
Куь вахтаркай ахъагъун.
Цмурдлай тир Угъланагъад
Башламишна эхтилат:
-Халуд мехъер(ю)къуз хьайи
Ахъайда кар,гьакъикъат.
Эвер гайи мугьманарин
Хатур хуьдай адет тир,
Т1алабай кар, вуч гьар сада,
Кьиле тухун хесет тир.
Гъавурдавай зи стхади
Варциз гьахьдай береда,
Ат1угъарна, ч1урна хьиз чин
Къвазна санал легьзеда:
Иесияр, гъвеч1и-ч1ехи,
Ша,агата,къуллугъа!
Ч1ехи бубад:-Чан хва,,хтул,
Лагь рик1евайд,буйругъа!
-Къуй атурай баде патав,
Анжах гьадаз лугьуда.
Гъана баде. Зи стхади
Сир бадедив вугуда.
-Гъваш къаршидиз зуьрне, далдам,
Гум алахьрай шишерлай,
Ч1ехи буба кьуна к1ула,
Элкъуьгъ, баде, к1валерлай!
Серсер хьанвай итим к1улаз
Яна бадед чукурнай,
Пагь ат1ана килигзавай
Мирес, къардаш ч1агурнай.
Гурлу капар, хъвер, зарафат,
-Ягъ са макьам,-теклифна,
Баде к1ула аваз буба
Демин юкьваз элифнай.
Пагь, илигнай Терекмадал,
Руг хкатиз к1вачеркай,
Ахкунач заз мад ахьтин кьуьл,
Карагзама вилеркай.
Веси я чи, ч1ехибурун,
Фикир гице адетриз,
Элкъуьн тавуй, килиг абур,
Вахтар финвай хкетриз!
Август 2013 йис.