* * *
Кьуд патай къвез яб денгзавай "далалай",
Шит рахунар гьам гижидан-нашидан,
Ч1алахъ жезвай дуьнья физва кьвалалай.
Бахтавар хьуй ван текъвезвай бишидан !
* * *
Гьар са кардиз вичив кьадай хас гьахъ я,
Гьар са касдиз вичив кьадай кас гьахъ я.
Ни вичи вич хкажайт1ан Шагь дагъдал,
Адаз халкьди гайи кьимет-мас гьахъ я.
***
Къачагърикай мал хуьх куьне,лезгияр.
Ягъийрикай к1вал хуьх куьне,лезгияр.
Эч1елрикай ч1ал хуьх куьне,лезгияр.
Руьгьдин къелед цал хуьх куьне,лезгияр !
***
-Акунарни цIалцIамвилер я заз хас
Белки зазни жен базарда кьимет –мас !
ИкI лагьана экъечIнава майдандиз,
КIереметдив акъажзавай пластмасс.
***
Мягькем къекъвей ч1авуз чили к1вач кьада,
Буш хьана хьуй алукьна ви к1вач хада,
Чандиз аман хтуй лугьуз элкъвена,
Яван хьайда гатфар кьиляй т1ач хвада.
***
Вахтар къведа кудай тапан тарихар,
Яд амачир вирериз яд хкведа.
Ч1ал ч1ат1унихъ маса гайи йиртихар,
Регьимдикай пай ат1ана къекъведа.
***
Табий хьанва жуван гьиссдиз,
КIантIа хъсан,кIантIа писди.
Зун чIугвазва даим вичел,
Ватан лугьур микьнатIисди !
***
Ви хирериз закай дарман хьаначтIа,
Уьмуьрди ваз гилани дад ганачтIа,
За шак гъизвач вун къаяхдин къван хьунал,
Зи сидкьидин жуьгьенри вун каначтIа.
***
Гьакъикъатди рикI хана, махаравай халкь.
Ават тийиз яргъалди, ахваравай халкь.
Яраб уях жедачтIа ви экуьнин кIек,
Аквадайвал пенжердай чи умуддин экв ? !
* * *
Зун алахъна дат1ана вун еке ийиз,
Вакай са ханум ийиз, са бике ийиз.
Хъсанвилин эвездиз писвал къвез хьана,
Вун галтугна кьулухъ зи , зал леке ийиз.
* * *
Уях хьухь асланар, перленгар !
Буш мийир,тIарам яхъ уьзенгар.
СикIерни чакъалар пара я,
Гвай чпив ван тийир тфенгар.
***
КIур язава и дуьньядиз "зирекда".
Гьахъвал тунва,жуфтна ракIар,куьлегда.
Умуд аваз хъсан вахтар къведайдахъ,
Диоген хьиз ацукьдани челегда!
***
Гунагьрин пар алай, туш зун са деве.
Ашкъидин гунагьар кьазва за хиве.
Гьахъ-гьисабдин юкъуз,магьшердин юкьвал,
Гъил къачу, я Аллагь, твамир зун кIеве .
***
Пис-хъсан, нукьсанар акун тавуртIа,
Авай гаф чин-чинал лугьун тавуртIа,
Куьз я ви кьуру тIвар «шаир» лугьудай,
Мез гапур хьана рахун тавуртIа.
***
ТIебиатдин тарс къачуна, кьатIана.
Вахт фейила за алцумна, атIана.
Сифте шагьвар,ахпа элкъвей тIурфандиз,
Заз гарукай къе ви ухшар атана.
***
Крар садбур,цIалцIам гафар-тапарар,
Чинни тумни сад хьанавай санкIарар.
Ихтибардай физва вилер,япарни,
КIвачин кьилел аквазвай хьиз ахварар.
***
ЧидайтIа варцелай элкъуьн хъийидай,
ГъалатI са леке туш чуьхуьн хъийидай.
Вучиз за ахъайнай ви кIвалин ракIар,
Вилик гъай тике фу къехуьн хъийидай.
***
Ви т1алдикай заз хабар я гьелбет,
Рик1е хер авай зи лезги миллет.
Гьазур я зун ви хирез дарман жез,
Ваз вафалу тир,ви багъри велед.
***
Буьркьвеба вандайди - баят барчи я,
Кьулухъа ядайди -къанлу къучи я.
Лишандик кутуна ви рик1 янат1а,
Вун адан халис гъуьрч -амни авчи я
***
Намус-гъейрат туна кьулухъ,
Сифте кьац1ал ала шулугъ.
Низ пул ава -адан гъиле,
Кар туьк1уьрдай къизил балугъ