Палэ, вон дыкхэн пэ манге
Лакэ дуй, калэ якха
Лэн э зор ай ви дэн ланга
О Ило, гуглэ дукха
Лакэ лунгэ шукар бал
Э балвал локхэс азбал
Лако стато жювляно
Пхарадас/э муро Ило!
Сар эк лащё кофари
Щютэм э як пэ ла
Мэ, сым ав о нирисари!
Тэ лоовла пала Ма.
Сар цирдэл пэй гитара
Дилабэл о дилы
Най, кхаты лако паро
Трубуй тавэл мури.
Ашундэм кэ вой драбарэл
Кэрдилас мангэ миштой
Кхэлэл цирдэл пэй гитара.
Атярав, кэ чи вэстой
Кана сы лэ манушэс
Бахтёри тэ драбарэс
Ащилас тэ на бистрэс
Тэ дилабэс, тэ кэлэс.
Лав, жяв ай мангавав ла
Шай давма армая
Мэ, зуралэс каамавла
Тал миндык паша ма.
Кай ласа чи аваса
Ка Ром, пал нямури
Миндык амэ сэраса
Мэ лако, вой мури.
Саконэ лащё щавэстэ
Бахталы Ромни тавэл
Мусай си тавэл пэ лэски
Сар пхэндал о Сунто Дэл.
Сы лэс годявэр шеро
Сы лэс дант сумнакуно
Лэ Дэвлэстар щинадо
Лунго траё бахтало
Яй, шоха тэ на мэрэн
Лэ Романэ щавэ
Мэк саконестэ пэрэл
Зор, Бах ай састипэ
Шоха тэна насвайвэн
Э Зор бари тэ лен
Мэк фэри тэ бар вай вэн
О траё тэ камэн