СIВЫ ГОЛУБ
Я забываю пакрысе
Бязладных дзён iмжу i лiха.
I сiвы голуб на страсе
Буркоча жаласна i цiха.
Пачуй далёкi голас мой
I адгукнiся — цiха-цiха...
I я забуду неспакой —
Бязладных дзён iмжу i лiха.
Я пакiдаю родны дом,
Каб анiколi не вярнуцца.
I нават гром, зiмовы гром
Мяне не змусiць азiрнуцца...
Забуду смутак пакрысе,
Але забудуцца не хутка:
I сiвы голуб на страсе,
I вечна сумная галубка...