ПАЛАНЭЗ АГІНСКАГА
У гэтым горадзе чужым,
Якi мне быў учора блiзкiм, —
Туман i дым, туман i дым.
I спакаваныя валiзкi.
У гэтым горадзе чужым
Я выпадковы i нязнаны.
Мне забыццём бiнтуюць раны
Туман i дым, туман i дым.
Туман — абложны, дым — густы.
Я забываю ўсё благое.
Туман i дым — маё былое.
Маё цяперашняе — Ты!
У гэтым горадзе чужым
Больш заставацца немагчыма.
Туман i дым — мая Радзiма.
I Ты адна у ёй — не дым...