ГIайиб, гьудул, лъидаго буго…
Гьаниб рагъ, доба рагъ, дуниял ккун рагъ –
Дие дандияв мун, дуй дандияв дун;
Дун витIарав вугин дурал чIвалев дун,
Йохъ, мун мекъса вугин дирал чIвалев мун.
Гьаниб цIа, доба цIа, кибго – кибго цIа,
ЦIехоге, дир гьудул, гIайибияв чи.
ГIеч зодоса бортун бачIинчIеб жеги! –
Мунги, дунги, гьудул, – нилъ гIайибиял!
Гьаб гIумру, дуниял гIасияб гьобо, –
Гьелъул ганчIазулъ нилъ ханжулъун кколел!
Амма гьеб гьободул кIиябго гамачI:
Цояв мун, цояв дун, нилъго лъурулел!
ЦIехоге, дир гьудул, цIехоге дуца, –
Дов тахъсирчи даим нилъелъ вахчулев!
Гьудул, гьев хIалихьат цIехоге дуца,
Гьев матIуялдацин лъачIев нилъеда!
06.02.2010 МахIачхъала