РакI дир буго тIенкIелеб, тIогьодасан щуб гIадин....
РакI дир буго тIенкIелеб, тIогьодасан щуб гIадин,
ТIул буго дир чвахулеб, чабхидасан ицц гIадин.
ГIищкъу буго дир бергьун, балай буго дир цIикIкIун.
ЦIа рекIун керен буго, канаб меседги бокьун.
Маргъалалъул черхалда, чараб ретIел ретIани,
ТIагIаял гIадамаца, гIайибалги гьарула.
Гьайбатаб габуралда, гвермендо чIван свердани,
Сабру гьечIеб черхилан, чанги бугьтанал лъола.
ЛъагIалий бекьараб хур, хола тIаде зоб щвани,
Щибунидай каранда кор боркьараб цIа ссунеб?
ЦIороб бижараб соно, бачIуна магIарухъе
Бице, эбе,л дидаги, дун хьвадизе кколей куц.
Зобалъул тIайпус буго, дида тIад тIавап гьабун
ТIамун кIичIгундай кквелеб, кквечIогундай биччалеб?
ЧIегIер лочнол тIинчI буго, тIоларого хадуса,
ХвегIан аскIобдай тела, течIогундай хъамила?
ХъахIаб итаркIо буго бусадул рагIалда чIун,
Боснобго къордай гъела, къватIибедай биччала?
Къама меседил гьуд-гьуд, къаданиб чIун гьардолищ,
Гьарараб жойищ кьелеб, кьалищ лъазе гьабилеб?
Кьурда балеб багIарбакъ, къалъун бугин дир бадиб,
Дица гьелда къвал базе изну кьеларищ, эбел?
Рукьбал руго риунел, ургьиб рекIараб цIаялъ,
ЦIар хъублъилин хIинкъиялъ, хIехьон лъабабго соналъ.
Ссудулеб буго керен, Камалил Баширилан,
Квенгин макьу кIочараб, чорхол гьаваги бергьун.
Беразул канлъи буго, кодоса босун унеб,
Каранда ракI хIал хьолеб, малъе, эбел, цо гIакълу.
-Гьай гIолей жо, Меседу, гIадамазул рагIи щиб?
Щула гьабун кIичI тIаме, тIайпусалъул хIатIида.
ХIал хъубазда лъанани, лъикIаб бахъине гьечIо
Хъата-масан кIичI тIаме, лочнол хIанчIил габуниб.
Дун эбел йигониги, дида щибго гьикъуге,
Гьабе дуйго бокьараб, рокьул мунагь гьечIелъул.
Гьаваялда багIар бакъ бадиб къалъун хадуса,
Къо гIадада биччаге, къвал базе данде йорта.
БецIаб сардилъ канаб моцI кодоб щведал ясахъе,
Кодоса ун бихьичIищ, хьвадизе лъаларого?
Хьухьил къоялъ багIарбакъ, къвал базе щун бугищ дуй
Щобда байрахъ чIвачIогун, чIухIун жанисан хьваде.
Жабрилас мугьру чIвараб, Расуласул дугъалда
Данде йортун къвал жеме, къватIул харбихъ гIин баге.
ГIищкъу бергьун батани, тоге иш нахъе тIамун,
Рокьуе сабаб буго, сордойил къвал базе вас.