МАРФ

             
Марф къвезава зи дакIардиз,
Шуьшейрилай  стIал-стIал.
Гьижрандин тIал гъизва рикIиз,
Кутаз руьгьдик са къал-макъал…
Зи дакIардин вилик галай,
Ахъа я кеф тутун тарцин,
Кьуразавай чимивиляй,
Акваз гила булахар цин…
Алатнани валай са пар?
Мад вуч кIанда ваз, тутун тар?
Хьана гила хупI бахтавар,
Акьад гила гъавурда вун!
Чир хьанани ваз заланвал,
Гьа вилив хуьз акъвазунин?
Гьикьван чIав тир рекьелла вил…
Зазни кIанда гьиссерин гьуьл!...
Белки вав гва, яб це, стIал,
KIанидакай зи  са хабар?
Белкини, куьн ятIа ярдин,
Гьикьванни саф, гьикьван ухшар
Вилин накъвар, инжи хьтин?
Яраб, шехьиз амазматIа…
Тутун тар хьиз, тамарзу яз.
Белки, ада ракъурнатIа,
Вун циферив вугана заз?