Икьван дердер аквар кьван чаз,
Ацакь вун чи кьилел, дагълар!
СтIур Далагь/ 12-лагьай виш йис.
За низ лугьун дердер жуван?
Са яб гудай кас авачир.
ЧIуру хьанва девран яман,
Итимвилихъ мас кумачир.
Лагь, я буба, нихъ жен чалахъ,
Тарифдайдахъ сивеллаз каф?
Модда гьатна ялтах, ялахъ,
Кьит хьанава ниятар саф…
Пул паталди хьанва къаних,
Мидагъа яз мукьва-кьили.
Гьахъвал акур кIвачин кIаник,
Акьуллуди жезва дили.
Вич затI тушиз мецераллай
«Къагьриманар» ава пара.
Дуьзди чIана-какурдавай,
Четин хьанва ийин чара
Къе незвайбур фу гузвай гъил,
Икрамдик ква гьар са пата.
Акъатзамач и кардай кьил,
Эхир-заман атанватIа?
Далагь буба, а ваз акур
Дагълари гьа эхиз ама.
Кьасар ийиз саки такур,
Секиндаказ негьиз ама.