Кьил чIуькьуьзва хиялри

            
Къе  гьавани  зи кефи хьиз  чIуру я,
Туьхвенава  ругьдин кIвале экверни…
Яд гатIанва - илгьамдин кам  къуру я,
ШуьтIкьенава  зи  бахчадин  цуькверни.

Марфадин ван авахьзавай къаварал,
СтIал-стIал къвезва кьилиз, тIал хьана...
Физ кIанзава рикIиз  экуь цаварал,
ЧIулав цифер  вилик гала, цал хьана.

Кефер  патай къвезвай  йигин  гарари
Зурзурзава са къайдада дакIарар…
Вучрай рехи тахьана бес чIарари,
Кьуд  пад  кьуна хаинвилер, тапарар…

Кьил чIуькьуьзва  виш дердини, хиялди,
Кьисмет туш заз якъин рикIин секинвал.
Са тескинвал гузва амма суалди:
Жедани  бес  кудай  къула серинвал?