Ахвар, вучиз вун мад закай катзава,
Туна мад зун дердин-гъамун гуьнгина?
Ви чкадал чанда азаб гьатзава.
Гьикьван жеда зун йифни югъ женгина?
Ахвар, хъша, секинара на зи рикI,
Гьижрандин тIал кьезил хьурай са тIимил.
Жемир, яб це, гъулгъуладиз вун шерик
Шумуд йиф я мичI тийиз за и кьве вил
Ахвар, хъша хиялар зи сустара,
Ахъая заз йиф акъатна вуна мах.
Мумкин ятIа, са легьзеда, са ара...
Минет хьуй ваз, зун кIанидан патав твах….