Мад хъфена вун, чубарук, туна зун,
КичIе хьана къаярикай чи патан.
Вун хъфена, мад дердини кьуна зун,-
Муг ви акваз ичIи хьанвай биябан...
Архайин хьухь, вафа ава дустунихъ,
Хуьда ви рехъ гатфаралди гьикI вилив.
Чаравилин жава ава дустунихъ,
Хъша вун фад, минет хьурай, зи кьилив.
Вун мад патав ацукь мани илигиз,
Мурк акъудиз ругьдин кIеле къунавай
Сефил я зун, ц1акулриз ви килигиз,
Зи чIередик вуна зулуз тунавай...